Быйыл дан эгиндеринин түшүмү 30%га аз
Алдын ала божомолдонгондой, быйыл дан эгиндеринин түшүмү 30%га аз. Бул тууралуу Айыл, суу чарба жана региондук өнүгүү министринин орун басары Азамат Мукашев бүгүн, 24-сентябрда Бишкекте өткөн маалымат жыйынында билдирди.
Анын айтымында, 2021-жыл дыйкандар үчүн оор жылдардан болду.
«Маселе суу менен камсыздоодо да, климаттын өзгөрүшүндө да болду, алар азыр биздин өлкөдө гана эмес, Борбордук Азиянын бардык жеринде, дүйнө жүзүндө болуп жатат. Биз алдын ала айткандай, тилекке каршы, быйыл түшүмдүн 30%ын ала албайбыз», – деди ал.
Эскерте кетсек, 2021-жылы өткөн жылга салыштырмалуу дан эгиндери 35%га аз жыйналды, тагыраак айтканда, бул 280 миң тоннага аз деп Айыл, суу чарба жана аймактарды өнүктүрүү министри Аскарбек Жаныбеков Биринчи Радиого берген маегинде айткан болчу.
Анын берген маалыматына таянсак, быйыл 473 гектар жерге кылкандуу дан эгиндери себилген. Анын ичинде 250сү буудай. Дан эгиндеринин жыйналуусу 87%ды түзөт.
Ал эми Улутстаткомдун маалыматы боюнча, үстүбүздөгү жылдын 23-июлуна карата дан эгиндери (буурчак өсүмдүктөрүн, күрүч жана гречканы кошпогондо) 230.7 миң гектар аянттан жыйналды, бул өткөн жылдын ушул мезгилине салыштырмалуу 3.3%га аз жана 285 миң тоннага жакын же 52%га аз дан бастырылды.
Быйыл жайында аномалдуу жогору температуранын жана вегетация мезгилинде сугат суунун жетишсиздигинин кесепетинен буудайдын дүң жыйымы – 41.4%га, арпа – 57.9%га, мөмө-жемиш өсүмдүктөрү – 31.2%га, картошка – 6.3%га жана бакча өсүмдүктөрү – 3.5%га кыскарган.
Бирок айрым депутаттар өлкөдөгү сугат суунун тартышсыздыгынын бир себебин Казакстанга кетип жаткан суу деп да айтышкан эле. ЖКнын депутаты Кенжебек Бокоев «Парламент» радиосуна курган маегинде Казакстанга суу 1983-жылдагы келишим боюнча берилип келгенин жана азыркы базар экономикасында бул туура эместигин айткан болчу.
Бүгүн, 24-сентябрда Улукбек Марипов жыйын өткөрүп, анда социалдык маанилүү тамак-аш азыктарынын, бензиндин жана дизелдик отундун бааларын турукташтыруу боюнча көрүлгөн чараларды карап, бирок ошол мезгилде «эң начар сценарийге» даяр болуш керектигин белгиледи.
«Бир нече кадам алдыга карап иштөө керектигин» белгилеген өкмөт башчысы күтүүсүз кырдаал түзүлүп же аба ырайы начарлап кеткен, түшүм жакшы болбой калган учурга даяр туруу үчүн айыл чарба азыктарынын мамлекеттик резервин түзүү зарылдыгын баса белгиледи.