Экономика министрлиги чет элдиктерге 500 долларга «санариптик көчмөн» статусун берүүнү сунуштоодо
Кыргызстандын бийлиги IT тармагында иштеген чет элдиктерге «санариптик көчмөн» статусун берүүнү көздөөдө. Бул макам боюнча убактылуу жобо даярдалып, Экономика министрлиги тарабынан коомдук талкууга коюлду.
«Санариптик көчмөн» (Digital nomad) макамы – чет элдик жаранга же жарандыгы жок адамга КРнын аймагына виза тариздебестен, турган жерине каттоого турбастан жана иштөө үчүн уруксат документтерин албай туруп, кирүүгө/жашоого мүмкүнчүлүк берген, ошондой эле АМТ аркылуу ТИМ органы берүүчү идентификациялык жеке номери жөнүндө маалыматты камтыган убактылуу укуктук макам.
Экономика министрлиги жаңы макамды алуучулардан 500 доллардан алууну көздөп жатат.
Бул токтомдун максаттары жана милдеттери экономикадагы инновациялык долбоорлорду жана жогорку технологиялуу тармактарды өнүктүрүү жана жагымдуу шарттарды түзүү, КРда маалыматтык-коммуникациялык технологиялар тармагындагы чет элдик жогорку квалификациялуу адистерди тартуу жана программалык продуктуларды иштеп чыгуу болуп саналат.
Ошондой эле «Санариптик көчмөн» макамын алуучу 1 жылга виза алуу (бир жылдык көп берилүүчү виза 225 АКШ доллары), ишке уруксат алуу (10 000 же 20 000 сом), келген жерине каттоого туруу зарылчылыгынан бошотулат, ошондой эле идентификациялык жеке номерге ээ болот. Юстиция министрлигинен, Мамлекеттик салык кызматынан жеңилдетилген кызматтарды ала алат, башкача айтканда олуттуу жеңилдиктерге ээ болот.
Ошондой эле «Санариптик көчмөн» макамына арыздарды кабыл алууну жана тиешелүү кызматтарды көрсөтүү ТИМге жүктөлөт.
