Машиненин айнегин караңгылатуу 80-120 миң сом болот – Экономика министрлиги токтом долбоорун иштеп чыкты
Экономика министрлиги «Автотранспорт каражаттарынын алдыңкы эшиктеринин каптал айнектерин караңгылатуу үчүн жыйымды төлөө жана уруксатты каттоо тартибин бекитүү тууралуу» Министрлер кабинетинин токтомунун долбоорун иштеп чыкты. Токтом долбоору коомдук талкууга чыкты.
Иштелип чыккан жобого ылайык, караңгылатуу үчүн жылына 80 миң сомдон 120 миң сомго чейин акы алуу сунушталууда:
- жеке жак – резиденттер үчүн 800 (80 000 сом) эсептик көрсөткүч
- юридикалык жактар үчүн – 1000 (100 000 сом) эсептик көрсөткүч
- резидент эместер үчүн – 1200 (120 000 сом) эсептик көрсөткүч.
- Транспорт каражатынын алдыңкы эшиктеринин каптал айнектерин күңүрттөөгө уруксатты каттоо үчүн арыз ээси түздөн-түз ыйгарым укуктуу органга же Электрондук кызмат көрсөтүүлөрдүн мамлекеттик порталы аркылуу кайрылууга тийиш
- Транспорт каражатынын алдыңкы эшиктеринин каптал айнектерин күңүрттөөгө уруксатты алуу үчүн акы накталай акча берүү же КРнын банктык мекемелери аркылуу ыйгарым укуктуу органдын эсебине акча которуу жолу менен төлөнөт
- Транспорт каражатынын алдыңкы эшиктеринин каптал айнектерин күңүрттөөгө уруксатты каттоо акы төлөө негизинде, жыйым төлөнгөндөн кийин гана ыйгарым укуктуу орган тарабынан ишке ашырылат
- М-1 категориясындагы транспорт каражаттарына уруксат берилет, бирок жүргүнчүлөрдү ташууну ишке ашырган (такси) жеңил автоунаасын кошпогондо
- Транспорт каражатынын алдыңкы эшиктеринин каптал айнектерин күңүрттөө боюнча иштерди уруксат катталгандан кийин, транспорт каражатынын ээси өз алдынча же мындай иштерди жүзөгө ашырган ишкердик субъект тарабынан аткарылат
- Транспорт каражатынын алдыңкы эшиктеринин каптал айнектерин арыз ээсинин каалоосу боюнча жарык өткөрүүнү чектөөсүз күңүрттөөгө жол берилет.
Күңүртөөгө уруксат берүү боюнча ыйгарым укуктуу орган КРнын Ички иштер министрлигинин «Унаа» мамлекеттик мекемесин аныктоо сунушталды.
Токтом долбооруна Министрлер кабинетинин башчысы кол койсо, 1-июндан тарта күчүнө кирет.
