Жерүйдө көп жылдардан бери биринчи жолу кайрадан балык өстүрүүнү пландап жатышат
Жерүйдө балык өстүрүү мүмкүнчүлүгүн түзүү үчүн суу ресурстарынын сапаты изилденип жатат.
«Альянс Алтын» компаниясы КРнын Улуттук илимдер академиясынын Биология институту жана Талас областтык мергенчилер жана балыкчылар коому менен биргеликте Таластын дарыяларын балык өстүрүүгө камдоо мүмкүнчүлүгүн аныктоо үчүн суу ресурстарына мониторинг жүргүзүү боюнча изилдөө иштерин жүргүзүүдө.
Мониторинг Жерүй кенинин лицензиялык аянтынан агып өткөн Түз-Ашуу, Жерүй, Чоң-Туз жана Чоң-Чычкан дарыяларында, ошондой эле Талас районунун Калба жана Күмүштак дарыяларында жүргүзүлдү.
Илимий-изилдөө иштеринин биринчи этабында жер үстүндөгү суулардын курамына гидробиологиялык изилдөөлөр жүргүзүлүп, аны деталдуу изилдеп чыккандан кийин балык кое берүү боюнча чечим кабыл алынат.
«Алдын ала экспресс-талдоолор жер үстүндөгү суулардын курамы балык чарбасы үчүн суу объектилеринин стандарттарына туура келерин көрсөткөн, бул өз кезегинде Талас облусунда биологиялык ар түрдүүлүктү жакшыртууга жана балык чарбасын өнүктүрүүгө үмүт бар экенин билдирет.
Бул максатта «Альянс Алтын» ЖЧК Ысык-Көлдүн форель чабактарын сатып алып, аларды Талас районунун атайын балыктар үчүн азык менен камсыздалган дарыяларында кое берүүгө каржылык жардам көрсөтөт», – деп билдиришти компаниядан.
Эске салсак, 2022-жылдын апрель айына карата Жерүй кенин иштетип жаткан «Альянс Алтын» компаниясы Талас районунун жергиликтүү бюджетине инфраструктураны өнүктүрүү жана кармоого 313 млн 454 миң сом бөлгөн.
