Депутаттар чиновниктерге мамлекеттик ишканаларды башкарууга уруксат бербей коюшту
Жогорку Кеңештин Бюджет, экономикалык жана фискалдык саясат боюнча комитети 30-январда минкаб мүчөлөрүнө жана президенттик аппараттын бөлүм башчыларына мамлекеттик компаниялардын директорлор кеңештеринде же байкоочу кеңештеринде кызмат ээлөөгө уруксат берген мыйзам долбоорун четке какты. Бул тууралуу Kaktus.media билдирет.
Басылманын маалыматына ылайык, долбоорду экономика жана коммерция министри Данияр Амангелдиев алып чыкты.
«Тартип азырынча аныктала элек. Кээ биринде айлык акы төлөнөт, башкаларында өз ыктыяры менен иштешет. Алар мамлекеттик үлүшү бар бардык акционердик коомдорго директорлор составына кире алышат», – деп белгиледи министр.
Эл өкүлдөрүнө минкабдын мындай идеясы жаккан жок. Депутат Дастан Бекешев чиновниктер мамлекет үчүн эки кызматты чогуу алып кетеринен күмөн санады.
«Биздин министрлер компанияларда да кызматтарды ээлегендей ушунчалык убактысы көппү? Дайыма парламентте отуруш керек деп президентке өзүңүз арызданбадыңыз беле? Ал эми долбоордун өзү коррупцияга каршы мыйзамга каршы келбейби?» – деп мыйзам долбооруна каршы экенин баса белгилеп, Бекешев суроо менен кайрылды.
Амангелдиев долбоор коррупцияга каршы күрөшүү мыйзамына каршы келбей турганын белгиледи.
Өз кезегинде депутат Марлен Маматалиев да долбоорго каршы пикирин билдирди. Ал «Манас» аэропортун мисалга келтирди.
«Министр аэропорттун директорлор кеңешине кирди дейли. Министр болуп туруп, эч нерсени оңдой албаса, ал жерде эмне кыла алат? Биз муну түшүнбөйбүз жана колдобойбуз. Мааниси жок иш”, – деди депутат.
«Бардык эле тармактык ишканаларда министрлер болбойт. Зарыл болгон өзүнчө приоритеттүү тармактар бар. Бүгүнкү күндө директорлор кеңеши өз алдынча чечет, бирок каржы ресурстары мамлекеттен келип түшкөндүктөн, ага жараша мамлекеттик линия болушу керек», – деп министр Амангелдиев депутаттарга түшүндүрүүгө аракет кылды.
Мыйзам долбооруна Эмил Токтошев, Таалайбек Масабиров жана Эльвира Сурабалдиева да каршы чыгышты.
Сурабалдиеванын айтымында, Башкы прокуратура мыйзам долбоору боюнча корутундусун даярдаган, ага ылайык документ кызыкчылыктардын кагылышы гана эмес, коррупцияга каршы күрөшүү мыйзамына да карама-каршы келет.
Талкуунун жыйынтыгында комитет мүчөлөрү мыйзам долбоорун жалпы четке кагышты.