АӨБ Бишкектеги абаны тазартуу боюнча 470 млн долларлык планын сунуштады

Бактынур Абдиева -

11-апрелде Азия өнүктүрүү банкы (АӨБ) Бишкекте абанын сапатын жакшыртуу боюнча иш-чаралар планынын алдын ала презентациясын өткөрдү. Бул план АӨБнын «Жашаганга ыңгайлуу шаарлар үчүн интеграцияланган жана инновациялык чечимдер» жана «Алматы — Бишкек экономикалык коридору» долбоорлорунун алкагында иштелип чыккан.

Презентация учурунда АӨБнын Кыргызстандагы туруктуу миссиясынын долбоорлорду башкаруу бөлүмүнүн башчысы Сезар Лоренс: «Бишкек тазараак энергияны колдонууга, үй чарбаларында энергияны натыйжалуу пайдаланууга, транспорт менен байланыштуу түтүндүн бөлүнүп чыгуусун азайтууга жана абанын булганышынын себептерин түшүндүрүүгө басым жасашы керек», — деп белгилеп кетти.

Ал эми ICF жетекчисинин орун басары Галина Артюхина борбор калаанын абасын тазартуу маселесин чечүүдө 11 приоритеттүү жол жана аларды ишке ашыруу үчүн мүмкүн болуучу чыгымдарды атады:

  • автотранспорт каражаттарынын зыяндуу заттарды чыгаруу стандарттарын өлчөө жана белгилөө — 9-16 млн доллар;
  • базалык изилдөө, анын ичинде мониторинг жана таасирди баалоо — 1.7-2 млн доллар;
  • турмуш-тиричилик жылытуу системасын көмүрдөн таза отунга өткөрүү — 20-25 млн доллар;
  • коомдук транспорттун инфраструктурасын модернизациялоо – 450-600 миң доллар;
  • шаар куруу жана шаарды өнүктүрүү үчүн курулуш нормаларын иштеп чыгуу/кайра карап чыгуу — 100-250 миң доллар;
  • жол чаңынын пайда болушуна жол бербөө — 100-250 миң доллар;
  • үйлөрдү жылуулоо — 375 млн доллар;
  • ДССУнун абанын сапатына байланыштуу бардык маанилүү ооруларын камтуу үчүн статистикалык жагдайды кеңири изилдөө — 200-350 миң доллар;
  • транспорттун агымынын өзгөрүшүнүн түтүндүн көлөмүнө жана абанын сапатына таасирин баалоо үчүн транспорттук суроо-талаптын моделин иштеп чыгуу — 1 млн доллар;
  • «Эко5/6» стандартындагы автоунааларын колдонууга өбөлгө түзүү үчүн экономикалык стимулдар — 25-50 млн доллар;
  • кыймыл талап кылган тебүүчү транспорт, жөө жүрүүнүн үлүшүн өстүрүү — 300-500 миң доллар.
Бардык сунушталган чараларды ишке ашыруунун жалпы баасы 433-471 млн долларды түзөт.

Сезар Лоренстин айтымында, эгерде Бишкек бул долбоорду ишке ашырса, анда Борбор Азиянын башка шаарларына үлгү боло алат.