Бишкек ЖЭБин газга өткөрүү үчүн 1.7 млрд сом инвестиция керек

Бишкек ЖЭБин газга өткөрүү үчүн 1.7 млрд сом инвестиция талап кылынат. Бул тууралуу Бишкектин мэринин орун басары Жыргалбек Шамыралиев Азия өнүктүрүү банкы (АӨБ) тарабынан даярдалган Бишкек шаарынын абасын тазартуу боюнча иш-чаралар планынын бет ачарында билдирди.

«Биз ЖЭБди газ менен жылытууга өткөрүүгө аракет кылып көргүбүз келет. Бул техникалык жактан мүмкүн. Эгер бир айдын ичинде газга өтсөк, ага 1.7 млрд [сом] керек болот», — деди Шамыралиев.

Андан тышкары Шамыралиев учурда Бишкек шаарында газ менен жүрүүчү 130 автобус каттап жатканын билдирди. Дагы 500дөн ашык газ менен жүрүүчү автобус сатып алуу пландалууда. АӨБ дагы 124 электроавтобус сатып алууга көмөктөшөт. Мэрия ошондой эле төрт эстакадалык жол жана коомдук транспорт үчүн өзүнчө атайын тилке курууну пландаштырууда — бул коомдук транспорттун ыңгайлуулугун жакшыртат.

Ошондой эле Бишкекте сейил бак жана скверлер үчүн 26 гектар жер бөлүнүп, сегиз веложолдун курулушу аяктап жатат.