Кыргызстанда 1-февралдан баштап жеке жактарга патенттин 33 гана түрү калат – тизмеси жана тарифтери
Министрлер кабинети патенттин түрлөрүн кыскартып, жеке жактарга эмгек ишмердүүлүгү боюнча патенттин 34 түрүн гана калтырды. Өкмөттүн токтому 1-февралдан тартып күчүнө кирет.
Төмөндө жеке жактар үчүн патенттин түрлөрү жана алардын айлык өлчөмдөрү келтирилет:
- Металл жана металл буюмдары менен иштөө боюнча кызмат көрсөтүүлөр – кызмат көрсөтүүлөрдүн түрүнө жараша 1 миң сомдон 6 миң сомго чейин
- Ачкычтарды жана кулпуларды даярдоо жана оңдоо – 500 сом
- Жасалма гүлдөрдү жана аза күтүү гүлчамбарларын жасап берүү кызматтары – 1 миң сом
- Мал жаюу боюнча кызмат көрсөтүү – 1500 сом
- Алтынды жеке жактардын казып алуусу – 3 миң сом
- Атайын медициналык жабдууларды оңдоо жана тейлөө – 1 миң сом
- Таштандыларды кайра иштетүүчү материалдарды алуу үчүн үй шартында кабыл алуу кызматтары – калдыктардын түрүнө жараша 500 сомдон 10 миң сомго чейин
- Атайын курулуш иштери – 6 миң сом
- Дизайнерлик иштер – 15 миң сом
- Фото иштери – 3 миң сомдон 5 миң сомго чейин
- Сүрөтчүлөрдүн ишмердүүлүгү – 1 миң сом
- Мааракелерди жана салтанаттарды тейлөө боюнча кызмат көрсөтүүлөр – 4 миң сом
- Үн жаздыруу жана видео тасма тартуу кызматы – 1500 сом
- Котормочунун кызматы – 2 миң сом, сурдокотормочунун кызматы – 300 сом
- Жеке ветеринардык кызмат – 3 миң сом
- Товарларды жана жүктөрдү таңгактоо боюнча кызмат көрсөтүүлөр – 2 миң сом
- Чет тилдерин, компьютердик техниканы, бухгалтердик эсепти, айдоочулук жана башка иштерди үйрөтүү – 2 миң сом, ал эми кызмат көрсөтүүлөр репетиторлук же окутуу түрүндө көрсөтүлсө – 600 сом
- Дарылоо массаждары жана ийне саюу кызматтары – 5 миң сом, эгерде мындай кызматтарды майып адам көрсөтсө – 1 миң сом
- Компьютерди жана байланышты оңдоо кызматтары – 4 миң сомдон 5 миң сомго чейин
- Жеке буюмдарды жана тиричилик буюмдарын оңдоо боюнча кызматтар – 1 миң сомдон 3 миң сомго чейин
- Жеке тейлөө кызматтары (арабада жүк ташуу, акы төлөнүүчү дааратканалар, кир жуугуч, коомдук жайларда радиодого акы төлөнүүчү жарнактарды алуу, ошондой эле телекөрсөтүү жана спутниктик антенналарды жана видеобайкоолорду орнотуу) – түрүнө жараша 150 сомдон 1000 сомго чейин
- Бала багуучулардын, багбандардын жана үй кызматчыларынын кызматы – 500 сом
- Баланы же ден соолугунун мүмкүнчүлүгү чектелген адамды багуу боюнча кызмат көрсөтүүлөр – 300 сом
- Укук тармагындагы иш-чаралар – 10 миң сом
- Шайлоо алдындагы үгүт иштерин жүргүзүү мезгилинде саясий партиялардын, талапкерлердин таламдарын билдирген байкоочулардын, ишенимдүү адамдардын, өкүлдөрдүн кызмат көрсөтүүлөрү – 700 сом
- Кыргызстандагы эмгек мигранттарынын өсүмдүк өстүрүү, мал чарбачылыгы, курулуш тармагындагы, ошондой эле жеке кызмат көрсөткөндөрдүн кызматы – 800 сом
- Курьердик ишмердүүлүк менен алектенүү – 1 миң сом
- 0% бирдиктүү салык ставкасы менен жөнөкөйлөтүлгөн салык тутумунда иштеген жеке ишкерлердин кызматкерлери – 700 сом
- Үйдө иштеген тигүүчүнүн кызматы – 700 сом
- Визажисттердин, чач тарачтардын, маникюр жана педикюр адистеринин кызматы – 2 миң сом
- Аянты 100 чарчы метрге чейин үйдөгү жеке баня кызматтары – 10 миң сом
- Айдоочулар – транспорттун түрүнө жараша 1 миң сомдон 8 миң сомго чейин, анын ичинде такси кызматы – 1 миң сом, унааларды ижарага берүү, бир унаага – 2 миң сом.