Кумтөрдү өнүктүрүүнүн кылдат стратегиясы иштелип чыкпаса, 2025-жылы токтошу мүмкүн — Тенгиз Бөлтүрүктүн каты
«Кумтөрдүн» мурдагы тышкы менеджери учурда камакта жаткан Тенгиз Бөлтүрүк өзүнүн жактоочусу аркылуу ачык кат жолдоду. Ал бийлик толук кандуу отчет берүүгө мүмкүнчүлүк бербегенин, түрмөгө чейин КГКны Сингапурдагы биржага чыгарууга даярдап башташканын, Кумтөрдү өнүктүрүүнүн кылдат ойлонулган стратегиясын иштеп чыкпаса, кенди казуу 2025-жылы токтоп калышы мүмкүн экенин айтат.
Катта Бөлтүрүк финансылык бузууларга аны олуттуу айыптап жана андан ары Кумтөр жана Холдинг боюнча толук кандуу отчет берүү мүмкүнчүлүгүн бербестен, ошондой эле E&Y (Эрнст энд Янг) эл аралык аудиторунун 2021-жылдагы КГК ишинин оң аудитордук отчетун жарыялабай туруп, Кумтөрдүн жетекчилерин камакка алууга нааразы болгонун айтат.
«КГК жетекчилеринин жаңы кыргыз командасынын натыйжалуу менеджменти биз мурдагы канадалык жетекчиликке караганда Кумтөрдү ийгиликтүү башкара алаарыбызды далилдеди жана 2021-2022-жылдардагы КГК ишинин мыкты жыйынтыктары бул фактыны таамай тастыктап турат, — дейт экс-жетекчи.
Ошондой эле учурда камакта жаткан Бөлтүрүк «Улуу көчмөндөр мурасы» улуттук холдингинде алдын ала сүйлөшүүлөрдү жүргүзүп жана КГКны Сингапурдагы биржага чыгарууга даярдап башташканын айтат.
«Кумтөрдүн биржадагы күтүлгөн баалоосу 2024-жылдын IV кварталында 6-7 млрд АКШ долларын түзөт. КГК акцияларынын 40%ын сатуу өлкө үчүн 2.5-2.8 млрд алып келет. Бул IPO деп аталат, ал дүйнөнүн көп өлкөлөрүндө ийгиликтүү жүзөгө ашырылып келет. Кумтөрдүн акцияларын биржада ачык жайгаштыргандан кийин акциялардын номиналдуу баасы кеминде 10 эсе өсөт. Мындай акция Кыргызстандын президентинин жана өкмөтүнүн беделине оң таасирин тийгизет.
30% акцияны сатууда түшкөн каражат (1.8-2.1 млрд доллар) жакынкы 3 жылда КР бюджетинин тартыштыгын жоёт жана төмөндөгүдөй мүмкүнчүлүктөрдү берет:
- Кумтөрдө жана кендин айланасында интенсивдүү геологиялык чалгындоо жүргүзүү жана алтындын запасын 600 тоннага чейин көбөйтүү, б.а. Кумтөрдү пайдалануу мөөнөтүн кийинки 30 жылга узартуу
- Кумтөрдө жаңы алтын казып алуучу фабриканы, жаңы жер астындагы кен казып алуучу жайды ишке киргизүү, учурдагы калдык сактоочу жайларды толук кайра иштетүү жана бошотуу, тышкы инвесторлорду тартуусуз кендин инфраструктурасын толук жаңыртуу
- Кумтөрдүн пайдасынын эсебинен Жетим-Тоо, Балачычкан, Сары-Жаз ГЭСИ ж.б. ири өнөр жай долбоорлорун каржылоо, бул долбоорлорго жыл сайын 250 млн долларга чейин чегерүү.
Эгерде Кумтөрдү өнүктүрүүнүн кылдат ойлонулган жана прагматикалык стратегиясын иштеп чыгууну баштабаса, анда 2025-жылы Кумтөр калдык сактоочу жайлардын толуп калышынан улам ишти токтотууга аргасыз болот, ал эми 7 жылдан кийин алтындын иш жүзүндө тастыкталган запастары аяктайт, — дейт ал.
Анын айтымында, азыркы учурда Кумтөрдө белгилүү бир адистиктердин олуттуу кадрдык тартыштыгы бар: геолог-чалгындоочулар, геотехниктер, инженер-изилдөөчүлөр, жер астындагы тоо инженерлери, долбоордук инженерлер жана менеджерлер жетишпейт. Мурда бул позициялар чет өлкөлүк адистер жана консультанттар тарабынан жабылган, ал эми азыр биз шашылыш түрдө Кумтөр үчүн гана эмес, жалпысынан улуттук кадрларды даярдашыбыз керек. Кумтөр шашылыш түрдө олуттуу өзгөртүүлөргө, технологияларды модернизациялоого, IT технологияларды киргизүүгө муктаж.
«Кумтөр өнөр жайдын жана республикабыздын гүлдөп өнүгүшүнүн флагманы болот деп үмүттөнөм», — Тенгиз Бөлтүрүк.