«Эти Бакыр Терексай» ЖЧК жумушчуларын 350 адамга кыскартты жана ишмердүүлүгүн токтотууда

Назира Абдиева -

“Эти Бакыр Терексай” ЖЧК “Терек” жана “Тереккан” кендериндеги иштерин токтотуп, жумушчулардын 50%ын кыскарткан. Бул тууралуу президенттин Жалал-Абад облусундагы ыйгарым укуктуу өкүлү Абсаттар Сыргабаевдин Turmush порталына берген маегинде айтылат.

Жумушчу комиссия менен биргеликте «Эти Бакыр Терексай» ЖЧКсынын ишмердүүлүгүн текшерип жаткан Сыргабаев түрк инвесторлору жумушун улантып жатканын, бирок иш темпин жайлатып, жумушчулардын санын кыскартканын айтты.

«Компания “Терек” жана “Тереккан” кендеринде жумушун токтотту, ага байланыштуу жумушчулардын саны 50%га кыскарды. Компаниянын өкүлдөрү геологиялык чалгындоо иштеринин жыйынтыгы алар күткөндөй болбогонун, ага байланыштуу кен казууну токтотуу чечимине келгенин жарыялашты. Буга байланыштуу кенди мамлекет өзүнүн балансына алат жана ишти «Кыргызалтын» ААК жүргүзөт. Бүгүнкү күндө мүлктүн баасы, тартылган инвестициянын көлөмү, чыгашалар бааланып жатат», – деди Сыргабаев.

Убактылуу жумуштан бошотулган жумушчуларга түшүндүрүү иштери жүргүзүлүүдө. Ишкана мамлекеттин балансына өтөөрү менен Сыргабаевдин айтымында, иш толук калыбына келет. Эки кенде 350дөн ашык жумушчу кыскартылган.

Эскерте кетсек, декабрдын башында министрлер кабинети «Эти Бакыр Терексай» ЖЧКсынын ишмердүүлүгүн башкаруу үчүн Cengiz Holding A.S. компаниясынын ишин изилдөө үчүн ведомстволор аралык жумушчу комиссия түзгөнү белгилүү болгон.

Комиссияга 2022-жылдын 31-декабрынан тартып Жалал-Абад облусунун Чаткал районунда жайгашкан Терек, Тереккан жана Перевальное кендериндеги ишин токтотуу жана «Эти Бакыр Терексай» ЖЧКсынын уставдык капиталындагы үлүшүн «Кыргызалтын» ААКсына өткөрүп берүү жөнүндө тапшырма берилген.

26-ноябрда өткөн элдик курултайда президент Садыр Жапаров Терек-Сай кенин иштетүү укугун мамлекетке толук өткөрүү боюнча сүйлөшүүлөр жүрүп жатканын билдирген.

  • «Эти Бакыр Терексай» ЖЧКсы биргелешкен ишкана, 25% үлүшү «Кыргызалтынга», 75%ы «Эти Бакырга» тагыраак айтканда, түркиялык Cengiz Holding конгломератына тиешелүү. Тоо-кен ишканасын түркиялык «Эти Бакыр» компаниясы толук каржылап, жалпы 230 млн доллар инвестиция салган. Ишканада 800дөн ашуун кыргызстандык жаран эмгектенип жаткан.