"Шоро" компаниясы Пакистанда өндүрүшүн ачууну талкуулады
"Шоро" компаниясынын өкүлдөрүнөн турган делегация Пакистанга барып, жергиликтүү ишкерлер менен биргелешкен ишканаларды ачуу маселелерин талкуулашты. Бул тууралуу КР Тышкы иштер министрлигинин билдирүүсүндө айтылат.
Министрликтин маалыматына караганда, 14-августта "Шоро" компаниясынын өкүлдөрүнөн турган делегация Пакистандын Равалпинди соода-өнөр жай палатасына барып, эки өлкөнүн ишкер чөйрөлөрүнүн ортосунда байланыштарды түзүү жана продукциянын ар кандай түрлөрүн, атап айтканда, биргелешкен тамак-аш азыктарынын өндүрүшүн ачуу максатында сүйлөшүүлөрдү жүргүзүшкөн.
"Иш-чаранын жүрүшүндө кыргызстандык ишкерлер пакистандык өнөктөштөр менен жергиликтүү рыноктун жана эки тарапка тең пайдалуу бизнестин өзгөчөлүктөрүн изилдөө үчүн B2B сүйлөшүүлөрүн жүргүзүштү", - дейт ТИМдин маалымат кызматы.
Белгилей кетсек, "Шоро" көп жылдардан бери тышкы рынокто чыгып келет. Компаниянын продукциялары Россия, Казакстан жана АКШда сатылат. 2022-жылдан бери "Шоро" компаниясы Перс булуңунун өлкөлөрүнө да бөтөлкөдөгү суу сатып келет.