Жалал-Абадда көмүскө экономиканын көлөмү 30%ды түзөт

УКМК Жалал-Абад облусунун аймагында иштеп жаткан ишкердик субъекттеринин санына мониторинг жүргүзгөн, анын натыйжасында Салык кызматынын расмий маалыматтары менен олуттуу айырма аныкталган. Бул тууралуу УКМК билдирди.

Алсак, Салык кызматынын маалыматы боюнча Жалал-Абад облусунун аймагында 7077 ишкердик субъект (соода борборлору, дүкөндөр, мейманканалар, кафелер, ашканалар, чач тарачтар, техникалык тейлөө станциясылар ж.б.) расмий катталган жана экономикалык ишмердигин жүргүзүп келет.

Бирок жүргүзүлгөн эсептөөдө, облустун аймагында 10 132 ишкердик субъект иштеп жаткандыгы аныкталып, бул Мамлекеттик салык кызматынын маалыматынан 3055 субъектке, б.а. 30.1%га көптүк кылат.

Азыркы учурда КР УКМКнын демилгеси менен мыйзамсыз иштеп жаткан ишкердик субъекттерди көмүскө экономикадан чыгаруу максатында профилдик мамлекеттик органдарды, анын ичинде салык кызматы, санэпидемстанция, архитектура, суу жана энергия менен камсыз кылуучу уюмдарды тартуу менен комиссия уюштурулган.

Бул иш-чаралар субъектерди легалдаштыруу жана алардын ишин КРнын колдонуудагы мыйзамдарына ылайык келтирүү үчүн багытталган.