Депутаттар Түрк инвестициялык фондун түзүү жөнүндө мыйзамын колдошту

Бүгүн, 6-декабрдагы Жогорку Кеңештин жыйынында  «2023-жылдын 16-мартында Анкара шаарында кол коюлган Түрк инвестициялык фондун уюштуруу жөнүндө макулдашууну ратификациялоо тууралуу» мыйзам долбоору үчүнчү окууда каралды. Бул тууралуу ЖКнын маалымат кызматы билдирди.

Такталгандай, фонд Түрк тилдүү мамлекеттер уюмунун (ТМУ) өлкөлөрүндө приоритеттүү бизнес-долбоорлорду каржылоо үчүн ресурстук база болуп саналат. Фонддун уставдык капиталы 500 млн долларын түзөт.

Кыргыз Республикасынын үлүшү 70 млн долларын түзөт жана 3 жылга республикалык бюджеттен төлөнөт. Фонддун уставдык капиталын толуктоо графигине ылайык, 5 млн АКШ доллары өлчөмүндөгү каражаттар фонддун уюштуруучулары тарабынан акционерлердин уюштуруу чогулушунан кийин 90 күндүн ичинде баштапкы салым катары төлөнөт.