Өрт коопсуздугунун ордуна көп кабаттуу үй: жарандар кооптуу аралыктагы курулушка нааразы
Бишкектеги Ажыбек Баатыр көчөсүндө 1В көп кабаттуу үйдүн жашоочулары алардын жанындагы Ажыбек Баатыр көчөсүндө 1Д "Алинур классик" деп аталган жаңы үйдүн курулушуна нааразы. Алардын үйүнүн жанына жаңы имарат салынып, жашоочуларга коркунуч жаралып, мамлекеттик органдар так жооп бербей, бири-бирине жөнөтүп жатышат. ИШКЕР MEDIA окуя менен жеринде таанышып, жергиликтүү тургундар жана «Бишкекбашкыархитектура» ишканасынын өкүлдөрү менен сүйлөштү.
Маалыматка ылайык, Бишкек шаарынын Ажыбек Баатыр көчөсүндө «Алинур групп» компаниясы тарабынан курулуш иштери жүрүп жатат. Долбоордун башкы планы 2023-жылдын март айынын аягында «Бишкекбашкыархитектура» тарабынан бекитилген. Бул убакыттын ичинде куруучулар экинчи кабатты көтөрө баштады. Талаш-тартыштарга имараттын так ошол үйдүн жанында өсүп жатканы себеп болгон.
Жергиликтүү тургун Эсен Имантуровдун айтымында, жергиликтүү коомчулук «Бишкекбашкыархитектурасынан» тарта президенттин администрациясына чейин бардык инстанцияларга кайрылышкан. Бирок маморгандар шаблондук жооптор менен кутулуп кетишкен.
«Бизде өрт чыккан учур болгон, куткаруучулар өрттү өчүрүү үчүн кире бериштеги терезелерди сындырышкан. Ал эми имаратты тосуп турган өтмөк болсо, атайын унаа 5 мүнөттө эле өтүп, өрттү өчүрүп коймок. Эгер дагы бир өзгөчө кырдаал жаралса, жашоочулар камалып калышат», - деди Имантуров.
Долбоордун аткарылышы документтер менен дал келбей турганын белгилей кетүү керек. Жаңы турак жай азыркы үйдүн жанында болбошу керек. Башкы план боюнча ал жерде бири-биринен ыңгайлуу аралыкта жайгашкан көп кабаттуу үйлөр курулушу керек, бирок иш жүзүндө жеке турак жайлар калган.
Тургундардын айтымында,алардын үйүнүн түштүк тарабында бир бөлмөлүү батирлер жайгашкан. Алардын терезелери ошо эле бир капталында гана жайгашкан жана жакында курулуп жаткан имарат аларды тосуп калат. Ошондой эле бул тараптан өрт өчүрүүчү атайын унаанын кирүүсүнө эч кандай жол жок - өтүү жана бурулуш үчүн жер жаңы имарат менен тосулуп калды. Тургундардын Өзгөчө кырдаалдар министрлиги, Мамэкотехинспекция өңдүү ведомстволор ойлонбой туруп нормаларга жооп бербеген долбоорду кантип бекитти деген суроосу толугу менен мыйзамдуу.
Бул талаштын экинчи аспектиси - унаа жүрүүчү жол. Мэрия бул үйдүн жашоочуларына жолдогон расмий катында жол бар деп жооп берген. Ал Башкы план боюнча жаңы салынып жаткан үйдүн түштүк тарабынан өтөт, бирок чындыгында курулуш компаниясы үйүндөгү батирлерди ушул жолду камтыган жабык аймак катары сатып, жарнамалап жатат. Бул маселе чечилбей калса, өтмөк коңшу үйдүн жашоочулары үчүн эле эмес, бүтүндөй кичирайон үчүн жабык бойдон калат.
Нааразы болгон тургундар менен жолугушууга «Бишкекбашкыархитектура» МИнын өкүлдөрү келишти. Бирок аткаминерлер бейрасмий келгенин белгилешти, анткени комиссия толук курамында чогулган эмес. Шаардыктар көп кабаттуу үйлөр кандай аралыкта курулушу керек деген суроолоруна так жооптор алышкан жок.
Маалым болгондой, Мамкурулуш мындан ары бул маселени чечпейт, анткени долбоор шаар куруу кеңешинде макулдашылган. Курулуштун жүрүшүн Мамэкотехинспекция жана Бишкек мэриясы көзөмөлгө алышы керек.
«Бишкекбашкыархитектуранын кызматкери келип, бирок ал курулуштун сапатына гана жооп берерин айтты. Бирок анын бекитилген долбоорго эч кандай тиешеси жок жана анын мыйзамдуулугун текшере албайт экен», - деп тургундар айтып берди.
Аткаминерлер шаар тургундарына Бишкектин мэриясына жана Мамэкотехинспекцияга кайрылууну сунушташты. Бишкектиктер маселени иликтеп, үйдүн жашоочуларынын коопсуздугу боюнча маселелерди чечүү үчүн тез арада мекемелер аралык комиссия түзүүнү суранышууда.