Чүй районунда медициналык таштандылар стихиялуу түрдө төгүлгөн жер тазаланды
Ысык-Ата районунда медициналык калдыктар (колдонулган шприцтер, кан алычу системалар жана башка медициналык таштандылар) алынып келинип, таштандыга ыргытылганын окуяга күбө болгондор билдиришкен. Бул тууралуу облустук администрациядан билдиришти.
Ысык-Ата райондук мамлекеттик администрациясынын чечими менен Жээк айыл аймагынын №479 контурунда жайгашкан аянты 11,20 га болгон таштанды полигону Кант шаарынын мэриясы тарабынан мөөнөтсүз пайдаланууга берилген.
Өз кезегинде 2022-жылдын 2-сентябрында Кант шаарынын мэриясы менен «Тазалык Сервис» ЖЧКсынын ортосунда таштандыларды иргеп алуу пунктун уюштуруу жана таштандыларды автоматтык түрдө сорттоочу линияны ишке киргизүү боюнча келишим түзүлгөн.
Бирок 2023-жылдын 22-декабрында Кант шаарынын мэриясынын адистери таштанды төгүүчү жайга барган учурда «Тазалык Сервис» ЖЧКсынын жогорудагы келишими аткарылбаганы фактысы аныкталып, бул боюнча акт түзүлгөн. Аталган актынын негизинде 2023-жылдын 22-декабрындагы Кант шаарынын мэриясы жогорудагы келишим боюнча өз милдеттерин аткарбагандыгы тууралуу билдирүү жөнөткөн.
Кийин, 2024-жылдын 16-февралында билдирүүнүн негизинде Кант шаарынын мэриясы менен «Тазалык сервис» ЖЧКсынын ортосундагы бул келишим токтотулган. Текшерүүнүн жүрүшүндө «Тазалык сервис» ЖЧКсы Кант шаарынын мэриясына билдирбестен, «Утиль Сервис» ЖЧК ишканасы менен медициналык таштандыларды чыгаруу боюнча келишим түзүп алганы белгилүү болгон.
2024-жылдын 11-мартында «Утиль Сервис» ЖЧКсына медициналык таштандыларды ташып чыгууга тыюу салуу жана полигондун аймагында пайда болгон медициналык калдыктарды талаптагыдай иретке келтирүү жана жок кылуу (ликвидация) боюнча эскертүү берилип, 2024-жылдын 1-октябрында «Утиль Сервис» ЖЧКсына медициналык таштандыларды ташып чыгууга тыюу салуу жөнүндө эскертүү берилген. Кыргыз Республикасынын Жоруктар жөнүндө кодексинин 115-беренеси («Таштандыларды белгисиз жайларга таштоо, өрттөп салуу») боюнча кылмыш иши козголуп, 23 миң сом айып салынган.
Ысык-Ата районунун прокуратурасы тарабынан жүргүзүлгөн текшерүүдөн кийин 2024-жылдын 2-апрелинде «Утиль Сервис» ЖЧКсы тарабынан күйүүчү жай (таштанды, мунай шламы, малдын өлүгү, катуу материалдар үчүн күйүүчү камерасы бар меш) чыгарылган. А 2024-жылдын 6-апрелинде ушул компания полигондон медициналык таштандыларды чыгарган.