> ## Content Index
> Fetch the complete content index at: https://im.kg/llms.txt
> Use this file to discover other available public pages before exploring further.

# Ч.Айтматов проспектисинде жолду кеңейтүү иштери башталды
- URL: https://im.kg/koom/2026/07/25/m-4/
- Published: 2026-07-25T06:35:13.000Z
- Updated: 2026-07-25T06:35:13.000Z
- Author: Айгерим Качкынбекова
- Tags: Коом

**Бишкекте жол тыгындарын азайтуу жана жол кыймылынын коопсуздугун жогорулатуу максатында Чыңгыз Айтматов проспектисинин бир бөлүгүндө жолду кеңейтүү иштери жүрүүдө. Бул тууралуу Бишкек шаарынын мэриясы билдирди.**

Маалыматка ылайык, 23-июлдан тарта Чыңгыз Айтматов проспектисинин Горький көчөсүнөн Ахунбаев көчөсүнө чейинки тилкесинде жолдун үч тилкелүү бөлүгүн талаптарга ылайык кеңейтүү жана реконструкциялоо иштери жүргүзүлүп жатат.

> Долбоордун негизги максаты – жолдун өткөрүү жөндөмдүүлүгүн жогорулатуу, тыгындарды азайтуу жана жол кыймылынын коопсуздугун камсыз кылуу.

Белгиленгендей, курулуш-монтаждоо иштери аяктагандан кийин аталган тилкеде унаалардын жүрүүсү кыйла ыңгайлуу болуп, жолдун өткөрүмдүүлүгү жакшырат.

> Учурда иштер бекитилген графикке ылайык жүргүзүлүүдө. Буга байланыштуу айрым учурларда унаа кыймылына убактылуу чектөөлөр киргизилиши мүмкүн.

Бишкек шаарынын мэриясы айдоочуларды каттамдарын алдын ала пландап, убактылуу жол белгилеринин талаптарын так сактоого чакырды.