> ## Content Index
> Fetch the complete content index at: https://im.kg/llms.txt
> Use this file to discover other available public pages before exploring further.

# Кыргызстанда такафул жана камсыздандыруунун жаңы эрежелери киргизилүүдө — эмне өзгөрөт?
- URL: https://im.kg/kyimylsyz-mulk/2026/03/31/kyrghyzstanda-takaful-zhana-kamsyzdandyruunun-zhany-eriezhielieri-kirghiziluudo-emnie-ozghorot/
- Published: 2026-03-31T04:28:39.000Z
- Updated: 2026-03-31T04:28:38.000Z
- Author: Мелис Совет уулу
- Tags: Кыймылсыз мүлк, #Жаңылыктар

**Министрлер кабинети камсыздандыруу тармагындагы жаңы эрежелерди бекитти. Алардын ичинде исламдык модель – такафулду киргизүү, ошондой эле топтолмо жана аннуитеттик** **камсыздандырууга карата жаңыланган талаптар бар.**

Бул документ камсыздандыруу рыногун модернизациялоого жана финансылык инструменттерди кеңейтүүгө багытталган.

Токтомго ылайык:

- биринчи жолу мыйзам алдындагы актылар деңгээлинде ислам принциптерине негизделген камсыздандыруу (такафул) бекитилди;
- топтолмо жана аннуитеттик камсыздандыруу үчүн өзүнчө талаптар жана жөнгө салуу киргизилди;
- бул ишмердүүлүктөрдү лицензиялоонун тартиби жаңыртылды.

Жаңы камсыздандыруу түрлөрүнө лицензияларды банктык эмес финансы рыногун жөнгө салган ыйгарым укуктуу орган берет. Алар мөөнөтсүз болуп, өлкөнүн бардык аймагында күчүндө болот.

Ошондой эле камсыздандыруу компанияларына коюлуучу талаптардын тизмеси бекитилди. Аларга уставдык капиталдын болушу, акционерлер тууралуу маалыматты ачыктоо, финансылык отчеттуулук жана төлөө жөндөмдүүлүк нормативдерин сактоо кирет.

Өзүнчө белгиленгендей, ислам принциптери боюнча иш алып барган учурдагы камсыздандыруу уюмдары алты айдын ичинде өз ишмердүүлүгүн жаңы эрежелерге ылайык келтириши керек.

Мындан тышкары, 2009-жылы кабыл алынган исламдык камсыздандырууну жөнгө салган мурдагы нормалар күчүн жоготту деп табылды.

---

****Аннуитет** — бул кредитти же карызды төлөөдө, ошондой эле камсыздандырууда убакыттын бирдей аралыгында (көбүнчө ай сайын) бирдей суммада төлөнүүчү же алынуучу үзгүлтүксүз төлөмдөр. ****Такафул** — бул ислам шариятына ылайык келген, катышуучулардын өз ара жардамдашуусуна жана тобокелдиктерди биргелешип бөлүштүрүүгө негизделген исламдык камсыздандыруу түрү.