> ## Content Index
> Fetch the complete content index at: https://im.kg/llms.txt
> Use this file to discover other available public pages before exploring further.

# Менчиктештирүү жөнүндө жаңы мыйзам долбоору парламентке киргизилди
- URL: https://im.kg/kyimylsyz-mulk/2026/04/12/menchikteshtiruu-zhonundo-zhany-myizam-dolbooru-parlamentke-kirgizildi/
- Published: 2026-04-12T05:47:00.000Z
- Updated: 2026-04-12T05:47:00.000Z
- Author: Мелис Совет уулу
- Tags: Кыймылсыз мүлк, Саясат

**Жогорку Кеңешке мамлекеттик менчикти менчиктештирүүнү масштабдуу реформалоо тууралуу мыйзам долбоору киргизилди. Документ мамлекеттик активдерди сатуу механизмдерин түп-тамырынан өзгөртүүнү жана инвесторлор үчүн жол-жоболорду жөнөкөйлөтүүнү сунуштайт. Демилгечи — Министрлер кабинети.**

> Долбоорго ылайык, мыйзамдардан буга чейин колдонулуп келген бир катар менчиктештирүү ыкмалары алынып салынат. Атап айтканда, конкурс аркылуу сатуу, ошондой эле мүлктү ижарага же башкарууга берүү жана кийин сатып алуу мүмкүнчүлүгү каралган схемалар жоюлат — бул механизмдер коррупциялык тобокелдиктерге дуушар болуп, иш жүзүндө дээрлик колдонулбай калган.

Ошол эле учурда жаңы модель киргизилет — негизги басым ачык аукциондорго жана процессти санариптештирүүгө жасалат.

> Алдыдагы соодалар тууралуу маалымат расмий интернет-ресурстарда жана мамлекеттик кызматтар порталында кеминде 30 күн мурда, ал эми стратегиялык объекттер боюнча 90 күн мурда жарыяланышы керек. Соодалардын жыйынтыктары да ачык түрдө жарыяланууга тийиш.

Дагы бир маанилүү өзгөрүү — менчиктештирүү боюнча ведомстволор аралык комиссиялар жоюлат. Алардын функциялары баалоочу уюмдарга өткөрүлүп берилет, бул бюрократияны кыскартып, келишимдерди тездетүүгө тийиш.

Мыйзам долбоору ошондой эле мамлекеттик мүлктү бөлүп төлөө (рассрочка) менен сатууга мүмкүнчүлүк берет. Бул учурда баштапкы төлөм кеминде 50% болушу керек, ал эми төлөө мөөнөтү бир жылдан ашпоого тийиш.

Өзүнчө стратегиялык объекттерге көзөмөл күчөтүлөт: аларды сатуу Жогорку Кенештин макулдугу менен гана мүмкүн болот.