АКШга туристтик визаны кантип алса болот

Америка Кошмо Штаттарына (АКШ) барууга Кыргызстандын жарандары виза алышы керек. Туристтик визага кантип кайрылуу керектиги тууралуу төмөнкү нускамадан окуңуз.

Иммиграциялык эмес визалар Америка Кошмо Штаттарына кыска мөөнөткө туризм, дарылануу, бизнес, убактылуу иштөө же окуу үчүн барууну каалаган башка өлкөлөрдүн жарандары үчүн каралган.

В категориясындагы көп жолку туристтик виза Кыргызстандын жарандарына 60 айга (беш жылга) берилет.

Иммиграциялык эмес визага арыз берип жатып, талапкер АКШда калууга ниети жок экенин далилдеши керек. Арыз ээси талаптарга жооп береби же жокпу деген чечимди консул кабыл алат, ал ар бир арыздын өзүнчө маанисин таразалайт.

1-кадам. Эл аралык паспортуңузду текшериңиз

Паспортуңуз АКШга пландаштырылган сапарыңыздан кийин кеминде алты ай бою жарактуу болушу керек (мисалы, эгер сиз АКШга март айында бир ай саякаттоону пландап жатсаңыз, паспортуңуз жок дегенде октябрга чейин жарактуу болушу зарыл).
Паспортуңузда "Виза" деген жери менен жок дегенде бир бош бет болушу керек.
Сүрөтүңүздү текшериңиз.

Визага анкета үчүн санарип сүрөт талап кылынат. Эгер жүктөгөн сүрөтүңүз талапка жооп бербесе, анкетаны сүрөтсүз толтурууну уланта берсеңиз болот. Бирок бул учурда интервьюга сиз менен бирге талапка жооп берген сүрөттү алып келүү керек болот. Сүрөткө кызматкерлери ар кандай элчиликтердин талаптарынан кабардар болгон, сүрөттү электрондук жана басма түрүндө берген фотосалондо алдын ала түшүп алганыңыз жакшы.

Сүрөт 5x5 см өлчөмүндө, анфас, акыркы алты айда тартылган, түстүү, ак фондо гана болушу керек. Диний себептерден улам эгерде беттин өзгөчөлүктөрүн жаап-жашырбаса баш кийимдерди кийүүгө уруксат берилет. Көз айнек тагылган сүрөттөргө линзалар тунук, караңгылатылган эмес, чагылтуу эффектиси, көлөкөлөрү, көздү жашырган жээкчелери жок болгондо гана уруксат берилет.

Эгер сиз сүрөтүңүздү интервьюга дароо жүктөөнүн ордуна өзү менен алып барсаңыз, визаңыздын берилиши көбүрөөк убакыт талап кылынышы мүмкүн.

Көңүл буруңуз: Сиздин сүрөтүңүз жогоруда айтылган талаптарга жооп бербесе, бирок анкетаны толтурууда система тарабынан кабыл алынган болсо да, маектешүүдө кабыл алынбайт. Андыктан, Консулдук бөлүм компьютерден анкетага кошуп жүктөгөн болсоңуз да, жогоруда айтылган талаптарга жооп берген сүрөттү интервьюга алып келүүнү сунуштайт.

2-кадам. Анкетаны толтуруңуз жана элчиликте маектешүү үчүн жолугушууга жазылыңыз

АКШга иммиграциялык эмес визага түздөн-түз кайрылуу арыз толтуруу менен башталат. DS-160 формасын толтуруу оңой, бирок күмөн санасаңыз, жакшыраак билген досуңуздан же жакыныңыздан сурасаңыз болот. Бул бир жарым саатка жакын убакытты алат. Арызыңызды тапшыргандан кийин, интервьюну пландаштыруу сыяктуу кийинки кадамдарга өтө аласыз.

DS-160 формасын толтурууда кандай документтер болуш керек?

Эл аралык паспорт
Саякат маршруту, эгерде сиз буга чейин саякат уюштурган болсоңуз, сиз кала турган даректерди да билишиңиз керек
Эгерде мурда АКШга барган болсоңуз, акыркы беш сапарларыңыздын датасы. Ошондой эле сизден акыркы беш жылдагы эл аралык саякат тарыхыңызды берүү суралышы мүмкүн
Резюме же биографиялык маалыматтар. Сизден учурдагы жана мурунку билимиңиз жана иш тажрыйбаңыз тууралуу маалымат талап кылынышы мүмкүн
Башка маалыматтар. Кээ бир талапкерлерлерге саякат максатына жараша, DS-160 формасын толтурууда кошумча маалымат берүүсү талап кылынат.

Бардык суроолорго англис тилинде жооп беришиңиз керек болсо да, суроолордун котормолорун колдонмонун жогорку оң бурчундагы ачылуучу менюдан көптөгөн тилдерде көрүүгө болот. Бул котормолор форманы англис тилинде толтурууга жардам берет.

Анкетаны толтуруу боюнча көп берилүүчү суроолорго жоопторду бул жерден тапса болот

3-кадам. Белгиленген күнү жана саатында консулдук бөлүмгө келиңиз, документтерди тапшырыңыз, консулдук жыйымды төлөңүз жана консул менен маектешиңиз.

Консулдук жыйым 160 долларды турат. Консулдук жыйымды төлөө бир гана доллар менен же төлөм күнүндөгү курс боюнча сом менен кабыл алынат. Башкача айтканда, аны жарым-жартылай доллар, жарым-жартылай сом менен төлөө мүмкүн эмес — мисалы, 100 доллар жана 60 долларын сом менен болбойт.

4-кадам. Визалуу паспорт

Эгер маегиңиз бүтүп, визаңыз жактырылган болсо, аны жума же шаршемби күнү саат 14:30да ала аласыз. Төлөгөндүгү тууралуу квитанция менен консулдук бөлүмдүн кире беришине барышыңыз керек.

Виза алганга чейин саякатыңыз үчүн акча төлөбөй турганыңыз жакшы. Эгерде төлөп салып, бирок виза албай калсаңыз АКШ элчилигинин Консулдук бөлүмү эч кандай жоготуу үчүн жооптуу эмес.

Ошондой эле визанын мөөнөтү АКШга кире ала турган мезгилди билдирерин эске алыңыз. Ар бир киргенде АКШнын иммиграция офицерлери АКШда канча убакыт кала аларыңызды аныкташат.