ЖИА бизнес-ассоциациясы ишкерлердин камалышына байланыштуу президентке кайрылуу жолдоду
ЖИА бизнес-ассоциациясы акыркы убактагы ишкерлердин камалышына байланыштуу президент Садыр Жапаровго кайрылуу жолдоп, адилет эрежелердин болушун, мүлктү коргоону жана ишкерликти колдоо боюнча кайрылуу жасады.
Ассоциация өз кайрылуусунда президенттин буга чейин кабыл алган, ишкерлерге стимул берген, мамлекет алардын укуктарын, кызыкчылыктарын, ошондой эле мүлкүн коргоого ишенимин арттырган "Менчикти коргоо, ишкерлерди жана инвесторлорду колдоо жөнүндөгү" эки жарлыгынын маанилүүлүгүн белгилеген.
Бирок ошол эле кезде JIA бүгүнкү күндө ишкерлердин камалышынан улам бизнес чөйрөсүндө тынчсыздануу менен белгисиздик жаралып жатканын да айтат.
"Мындай аракеттердин уланышы ишкердик активдүүлүктүн төмөндөшүнө жана өлкөдөн инвестициянын агып кетишине алып келиши мүмкүн. Өлкөнүн экономикасына тышкы жана ички инвесторлорду тартууга чакырыктар жагымдуу инвестициялык климат, ошондой эле бизнести колдогон туруктуу саясат менен колдоого алынышы керек, бул инвесторлорду тартууга жана алардын ишенимин жогорулатууга мүмкүндүк берет.
Биз мамлекеттик саясатты экономиканы узак мөөнөттүү өнүктүрүүгө, бизнес чөйрөнүн туруктуу өнүгүүсүн кепилдөөгө, адилеттүү эрежелерди камсыз кылууга, менчикти коргоого, ишкердикти колдоо жана коррупциянын алдын алуу боюнча чараларды көрүүгө чакырабыз. Мындай иш-аракеттер ишкерлердин ыктыярдуу салыктык кирешелеринин аркасында экономиканын жана коомдун туруктуу өнүгүшүнө салым кошот деп эсептейбиз", - деп айтылат кайрылууда.
Бизнес-ассоциация мамлекет башчысына жасаган кайрылуусун Жапаровдун бизнес жана инвестицияларды өнүктүрүү боюнча Кеңештин жыйынындагы "туруктуу экономика, бизнес-түзүмдөрдүн ачык иштеши, ишкердикти өнүктүрүү – симбиоздо өлкөбүздүн жаркын келечегинин ачкычы болуп саналат. Анткени, инвестициялар социалдык-экономикалык өнүгүүнүн негизи гана эмес, ошондой эле жаңы жумуш орундары, заманбап башкаруучулук тажрыйба, региондорду өнүктүрүү жана өлкөнүн экспорттук потенциалын жогорулатуу болуп саналат" деген сөзү менен жыйынтыктаган.
Эскерте кетсек, буга чейин "Эмарк Групп" жана "Авангард Стиль" курулуш компанияларынын жетекчилери Чолпонбек Акматов менен Эрнис Миңкеев, ошондой эле "Элит Хаустун" негиздөөчүсү Тимур Файзиев кармалган.