> ## Content Index
> Fetch the complete content index at: https://im.kg/llms.txt
> Use this file to discover other available public pages before exploring further.

# Жолдорду асфальттоо 5 километрден кем болбошу керек – С.Жапаров
- URL: https://im.kg/transport/2026/04/14/zholdordu-asfalttoo-5-kilometrden-kem-bolboshu-kerek-s-zhaparov/
- Published: 2026-04-14T05:05:27.000Z
- Updated: 2026-04-14T05:05:27.000Z
- Author: Мелис Совет уулу
- Tags: Транспорт, Саясат

**Ош облусунун Чоң-Алай районунун тургундары менен жолугушууда президент Садыр Жапаров жергиликтүү тургундун арызынан кийин транспорт министри Талантбек Солтобаевге эскертүү берди.**

Айыл тургундарынын бири керектүү 3 км жолдун болгону 1 км гана асфальтталып, калган бөлүгү бүткөрүлбөй калганын билдирди. Президент акыркы беш жылдан бери жолдорду кыска тилкелер менен асфальттоо практикасын токтотууну талап кылып келатканын айтты.

Президенттин айтымында, жолдорду жок дегенде 5 кмден кем эмес асфальттоо керек. Мындай учурда ошол жерде асфальт-бетон заводу курулуп, керектүү техника жана материалдар жеткирилет, бул иштердин наркын кыйла төмөндөтөт.

"Эгер ушул жылдан баштап кайра 1 кмден асфальттоо уланса — таарынба. Минимум 5 кмден болсун. Эгер асфальттайм десең — айылдын жолун толугу менен бүтүр", — деп кайрылды президент Солтобаевге.

Өз кезегинде министр асфальт-бетон заводдорунун жетишсиздиги көйгөй болуп жатканын айтты. Бөлүнгөн каражатка 10 завод сатылып алынган, бирок алар жол курулушу көп болгон аймактарга жайгаштырылган.

![](https://storage.ghost.io/c/64/0f/640fd1f7-7b7a-4402-b729-688b0de60d32/content/images/2026/04/---------1.jpeg)

![](https://storage.ghost.io/c/64/0f/640fd1f7-7b7a-4402-b729-688b0de60d32/content/images/2026/04/--------.jpeg)

![](https://storage.ghost.io/c/64/0f/640fd1f7-7b7a-4402-b729-688b0de60d32/content/images/2026/04/Unknown-9.jpeg)

"Азыр этап-этабы менен бул жакка да завод алып келүү керек. Анткени Оштон ташылган асфальттын сапаты анча жакшы болбойт", — деди Солтобаев.

Президент дооматтар Солтобаевге эмес, быйылкы дайындоого чейин иштеген мурдагы жетекчилерге тиешелүү экенин тактады.

"Ойлоп көргүлө, Чоң-Алайдагы бир айылга 200 км алыстан асфальт ташып келип, болгону 1 км жол салышкан. Бул чоң чыгым — 5 эсе кымбат. Отчет беришет: ушунча техника келди, ушунча күйүүчү май кетти дешет. Ошондуктан айтам — минимум 5 километрден болсун. Биз дагы айылдарга жетебиз, азыр болсо райондор менен айылдарды байланыштырган стратегиялык жолдорду куруу керек. Депутаттардын же министрлердин суранычы менен 1 км же 500 метрден жол курбагыла", — деп жыйынтыктады Жапаров.