Быйыл жарым жылда финансы уюмдарынын кирешеси 60 млрд сомду түздү – 32%га өстү
2023-жылдын январь-июнунда экономиканын финансы секторунун уюмдарынын кирешелеринин суммардык көлөмү 2022-жылдын тийиштүү мезгилине салыштырмалуу 32%га көбөйүү менен 61 млрд сомду түздү. Мындай маалыматты Улутстатком берди.
Улутстатком бул коммерциялык банктардын кирешелеринин өсүшү менен камсыз болгонун билдирди. Ошол эле кезде финансы секторунун уюмдарынын жалпы чыгымдары 37%га көбөйүп, 38 млрд сомго жакындаган.
2023-жылдын I жарым жылдыгында экономиканын финансы секторунда 640 уюм, анын ичинде Улуттук банк, 23 коммерциялык банк, 601 банктык эмес финансылык-кредиттик уюм жана 15 камсыздандыруу компаниясы ишин жүргүздү.
I жарым жылдыгында экономиканын финансы секторунун ишканаларынын ишмердүүлүгүнүн көрсөткүчтөрү
(млн. сом)
| Кирешелер | Жалпы чыгымдар | Сальдолоштурулган | |||
2022 | 2023 | 2022 | 2023 | 2022 | 2023 | |
Бардыгы | 46 120,0 | 61 001,3 | 27 691,2 | 37 868,4 | 18 418,1 | 23 146,9 |
Банктар | 40 433,2 | 53 047,3 | 23 524,0 | 32 187,9 | 16 899,7 | 20 872,6 |
Күрөөканалар | 443,5 | 773,5 | 279,0 | 558,5 | 163,3 | 215,0 |
Кредиттик союздар | 118,0 | 103,1 | 83,4 | 80,5 | 34,6 | 22,5 |
Микрокредиттик уюмдар | 3 936,2 | 5 252,2 | 2 743,1 | 3 502,5 | 1 193,0 | 1 750,6 |
Камсыздандыруу уюмдар | 1 164,5 | 1 800,9 | 1 040,6 | 1 523,4 | 123,9 | 277,5 |
Башка уюмдар | 24,6 | 24,3 | 21,1 | 15,6 | 3,6 | 8,7 |
2023-жылдын I жарым жылдыгынын жыйынтыгы боюнча ишканалардын 64.5%ы пайда алышты, ал эми 15.6%ы чыгаша тартышкан. Сальдолоштурулган финансылык жыйынтык 23.1 млрд сом пайда суммасында түзүлдү, бул 2022-жылдын январь-июнь айларына салыштырмалуу 4,7 млрд сомго көп.
Негизинен пайданын өсүшү коммерциялык банктар жана микрокредиттик уюмдар тарабынан камсыздалды.
2023-жылдын 1-июлуна карата банктардын жана банктык эмес финансылык-кредиттик уюмдардын ачык кредиттик портфелинин суммардык көлөмү 266 миллиарддан ашык сомду түздү.
Кредиттердин жалпы көлөмүнүн дээрлик 86%ы банк секторуна, банктык эмес финансылык-кредиттик уюмдарынын секторуна — 14%ы туура келди. Кредиттөөнүн негизги багыттары соода чөйрөсү (жалпы көлөмүнүн 25.7%ы), керектөө муктаждыктары (21.7%ы), айыл чарба (18.8%ы), ипотека (10.4%ы), курулуш (5.6%ы) жана өнөр жай (5.2%ы) болуп саналды.
