11 мамлекеттин өкүлдөрү катышкан виртуалдык жыйын өттү – БАРЭК
2021-жылдын 30-июнунда «Борбордук-азия регионалдык экономикалык кызматташуу» (БАРЭК) программасынын алкагында мамлекеттик кызмат адамдарынын кезектеги онлайн жолугушуусу болуп өттү. Ага КРнын Экономика жана Каржы, Санариптик өнүгүү, Саламаттыкты сактоо жана социалдык өнүгүү министрликтеринин, Туризм департаментинин өкүлдөрү катышкан. Бул тууралуу Экономика министрлигинин маалымат кызматы бүгүн, 6-июлда кабарлады.
Жалпысынан виртуалдык иш-чарага БАРЭКке 11 мамлекеттин өкүлдөрү катышты.
Жолугушууда БАРЭКтин программаларына ылайык бир топ маселелер каралды.
- БАРЭКтин максаттарына жетүү жана жаңы демилгелер жөнүндө учурдагы маалымат, анын ичинде 2030-жылга чейин БАРЭКтин өнүгүү багытындагы отчету
- БАРЭКтин ден-соолук жаатындагы кызматташтыгы, 2030-жылга чейинки стратегиясынын долбоору
- БАРЭКтин санарип стратегиясынын долбоору (2030)
- БАРЭКтин регионалдык инфраструктуралык долбоорлорун жеңилдетүү инструменти жана таза суу маселесине байланышкан көйгөйлөр
- 2021-жылдын ноябрына пландаштырылган конференцияга даярдык көрүү
БАРЭК программасы – экономикалык өсүүгө жана жакырчылыкты кыскартууга багытталган, кызматташтык аркылуу өнүгүүнү илгерилетүү үчүн биргелешип иштеп жаткан 11 мүчө-мамлекеттин өнөктөштүгү. БАРЭКке мүчө өлкөлөргө: Афганистан, Азербайжан, КЭР, Грузия, Казакстан, КР, Монголия, Пакистан, Тажикстан, Түркмөнстан жана Өзбекстан кирет. Аймактык кызматташуунун приоритеттүү багыттары болуп транспорт, энергетика, соода саясаты жана бажы жол-жоболорун жөнөкөйлөтүү жана сооданы иштерин жеңилдетүү саналат.
