Институционалдык деңгээлдеги финансылык кызматтарды көрсөтүүчү StoneX Group Inc., америкалык корпорациясы «Кыргызалтын» ААКсына каршы 1 млн доллардан ашуун доо арыз менен Лондон сотуна кайрылды. Арызды Лондондогу алтын рыногун жөнгө салуучу изилдеп жатат, эгер мыйзам бузуулар табылса, «Кыргызалтын» эл аралык алтын рынокторуна кире албай калуу коркунучу бар. Бул тууралуу The Wall Street Journal басылмасынын макаласында айтылат.

Centerra и StoneX компанияларынын соттук иштери менен жакындан тааныш адамдардын айтымында, май айында, Кумтөр кенин кыргыз бийлиги көзөмөлгө алганда, мамлекеттик аффинаждык компания StoneX ишканасына алтын ташууну үзгүлтүккө учуратып, 29 млн долларга жакын акчаны кармап калууга аракет кылган деп айтылат басылмада.

StoneX компаниясынын айтымында, «Кыргызалтын» трейдерге Well Fargo эсебине акча которуу талабы менен эсеп-фактурасын жөнөткөн, ал болсо, Wells Fargo & Co атынын туура эмес жазылышы болгон.

Компания Лондондун сотуна алтын келишимин хеджирлөөдө келтирилген чыгымдарды жабуу үчүн аффинаждык заводго каршы 1 млн доллардан ашуун доо койгон.

«Баалуу металлдар рыногунун Лондон Ассоциациясы алтынды кайра иштетүүчү заводго каршы айыптоолорду изилдеп жатат жана анын эрежелери менен принциптеринин бузулушуна олуттуу карайт», – дейт Лондон алтын рыногунун көзөмөлдөө боюнча аткаруучу директору жана башкы кеңешчиси Сахил Мирза.

Эгерде ассоциация «Кыргызалтынга» каршы бир нерсе тапса, анда ишкана рынокко кирчү ишенимдүү аффинаждык заводдордун тизмесинен чыгарылышы мүмкүн. Бул анын эл аралык алтын базарларында соода кылуусуна тоскоол боло турган сейрек кадам деп айтылат The Wall Street Journal басылмасынын макаласында.

Эске сала кетсек, буга чейин «Кыргызалтын» 29 млн долларды уруксатсыз банк эсебине которуу аракети тууралуу билдирүүнү четке каккан.