Кыргызстан Египеттен картошка жана цитрус жемиштерин импорттоого кызыкдар. Бул тууралуу Айыл чарба министри Аскарбек Джаныбеков Египет Араб Республикасынын КРгы элчиси Манал Элсаид Йехия Элшиннави менен жолугушуусунда айтылган. Бул жагдайга коомдук ишмер жана активист Тилек Токтогазиев фейсбук баракчасында өз оюн билдирди.

Анын айтымында, кыргызстандык дыйкандар картошканы жетишээрлик деңгээлде өндүрүшөт жана ал кээде сатылбай ашып калган учурлары да болот.

«Биздин дыйкандар картошканы Кыргызстандын өзүбүздүн ички керектүүлүгүнөн дээрлик эки эсе көбүрөөк өндүрөт. Жылда ашып калган картошканы каякка сатабыз деп карапайым дыйкандардын башы ооруйт. Өзүңөр билгендей эле, учурунда бир министр так ошол картошка сатылбай, массалык түрдө чирип кеткен үчүн, өзүнүн кызматынан кеткен.

Эми биз өзүбүздөн ашып ташып жаткан картошканы дагы миңдеген километрлер алыс жайгашкан Египеттен бери ташып келебизби? Бул эмне деген нонсенс? Бул эмне деген өзүн өзү сыйлабастык?», – деди ал.  

Токтогазиев билдиргендей, кыргызстандык атка минерлер эл аралык деңгээлдеги сүйлөшүүлөргө даярданбай эле келишет.

«Суунун башында туруп, чөлдө жайгашкан Түркмөнстандан помидор менен сабиз сатып алабыз. Суунун башында туруп, Өзбекстандан жер жемиш, мөмө жемиштерди сатып алабыз.Суунун башында туруп эми, Египеттен картошка ташыйбызбы?», – деп тынчсызданды ал.

Ошондой эле ал азыркы айыл-чарба министрлигинин саясаты ушундай болсо, анда алдыда дыйкандар үчүн абдан оор убакыт келгенин айтты.

«Бизде азыркы учурда экспортко чыгара турган картошка, сүт, төө бурчак, өрүк, жана дагы бир нече эле жер жемиштер бар. Кайра иштетилген продукция болсо экспортко аз эле чыгат. Жок дегенде ошолорду экспортко жөнөтүп, кайра иштетүү секторго басым кылышыбыз керек. Тилекке каршы, биз агрардык өлкө эмеспиз. Агрардык саясатты түп тамыры менен өзгөртүш керек. Эң негизги приоритет ички өндүрүшкө берилиш керек. Импортту азайтып, ата мекендик өндүрүүчүлөрдү колдоп, экспортко чыгарганга жакшыраак шарттарды түзүш керекпиз», – деген оюн билдирди Токтогазиев.