Кыргызстанда Кореянын «КОПИЯ» борбору ачылды. Бул үчүн Кыргыз Улуттук университетинин ботаникалык бак аянтчасынан эки гектар жер бөлүнүп берилди. Борбордун ачылыш аземине айыл, суу чарба жана региондорду өнүктүрүү министри Аскарбек Жаныбеков, Кореянын Кыргызстандагы толук ыйгарым укуктуу элчиси Ли Вон Дже, улуттук илимдер академиясынын окумуштуулары, коомдук ишмерлер жана агрардык тармактын адистери катышканын Биринчи радиодон кабарлашты.

Ачылган борбордо Кореянын агрардык тармагындагы тажрыйбалуу окумуштуу адистер эмгектенишип, Кореянын агрардык чөйрөдөгү жогорку технологиялары менен түшүмдү көп бере турган өсүмдүктөрдүн түрүн өстүрүшөт. Ошондой эле бул борбордо орто жана чакан чарба жетекчилерине алдыңкы тажрыйбалар окутула тургандыгын Кореянын КРгы элчиси элчиси Ли Вон Дже белгиледи.

«Кыргызстан агрардык өлкө, республиканын калкынын 60%дан ашыгы айыл жергесинде жашап, алар дыйканчылык менен эмгектенишет. Демек, агрардык тармак өлкөнүн экономикасын өнүктүрүүгө чоң салым кошот», – деди элчи.

Эскерте кетсек, жыл башында КРнын Айыл чарба министрлиги Корея Республикасынын Айылдык өнүгүү мамлекеттик департаментинин өкүлү менен меморандумга кол коюшкан.

Долбоордун негизги максаты – айыл-чарба адистигинин студенттерин, окумуштууларын, изилдөөчүлөрүн, фермерлерин акыркы корей агротехнологиялары менен окутуу жана тааныштыруу, жергиликтүү калктын айыл чарба бизнесине болгон кызыгуусун жогорулатуу болуп саналат.