«Центерра Голд» «Кумтөр Голд Компани» ЖАКтын социалдык түйүндөгү баракчасына жарыяланган сүрөттөр менен видеолордо кендин борбордук карьерин суу каптап жатканына көңүл бурду.

Бул сүрөттөргө таянып, канадалык компания Кумтөрдүн борбордук карьеринин түбүндө кеминде 40 метр суу топтолгон болушу мүмкүн деп божомолдоодо.

«Centerra компаниясы көзөмөлдөгөн 25 жылдан ашуун убакыттан бери карьердин түбүндө мындай суу топтолгон эмес. Бул жагдай кенге жана анын жумушчуларына эле эмес, айлана-чөйрөгө да катастрофалык кесепеттерге алып келген зыян берет. Коопсуздук жана иштөө маселесин чечүү үчүн тез арада чара көрүү керек деп эсептейбиз», – деп айтылат компаниянын маалыматында.

«Кумтөр Голд Компанинин» президенти катары 2020-жылдын январына чейин беш жыл бою кенди башкарган «Центерранын» операциялык директору Дэн Дежардиндин айтымында, кен иштеткен тажрыйбалуу адам карьердеги топтолгон суу – стабилдүүлүктү төмөндөтөөрүн жана каптал тектеринин кулап калуу коркунучун жогорулатарын билиш керек дейт. «Кумтөр мөңгүлөргө жакын жайгашкандыктан, ал жердеги сууну сордуруп туруу кендин коопсуз иштеши үчүн дайыма маанилүү болгон. Биз шахтаны иштеткенибизде, мөңгүдөгү ээриген суунун дээрлик баары ачык карьерге жеткенге чейин чыгарылчу», – деди ал.

«Учурда мөңгү суусу карьерге көзөмөлсүз агып жатат. Бул кендин жумушчуларынын коопсуздугуна олуттуу коркунуч келтирет. Биз өкмөт дайындаган жетекчилик кендин абалын баалоо үчүн дароо тоо-кен тармагындагы көз карандысыз эксперттерди тартууга жана анын жыйынтыгын баарына көрсөтүү керек деп эсептейбиз», – деди Дежарден.

Ал ошондой эле кыргыз өкмөтүн көз карандысыз жергиликтүү жана эл аралык журналисттердин кенге келип, ал жерде эмне болуп жатканын көрүүгө уруксат берүүгө чакырды.

Centerra азыркы жетекчилик кенди коопсуз иштетүү үчүн керектүү ресурстарды бербей жатканына тынчсыздануусун билдирди.