Ишкерлер үчүн камсыздандыруу төгүмдөрү азайтылат жана алар бир нече салыктын ордуна бир салык төлөшөт
Президент Садыр Жапаров кечээ, 31-августта, Эгемендүүлүк күнүнө карата куттуктоосунда 15 жумушчу орунду түзгөн ишкерлер үчүн камсыздандыруу төгүмдөрүнүн өлчөмүн 17%дан 4%га чейин түшүрүүнү убада кылды.
Анын айтымында, министрлер кабинети тиешелүү жарлыктарды жана токтомдорду даярдап жатат. Президент ошондой эле салык жаатында чоң өзгөрүүлөрдү убада кылды. Анын айтымында, ишкерлер жаңы жылдан баштап салыктын бир нече түрүн төлөөнүн ордуна бир гана салык түрүн төлөшөт.
Бирок иш жүзүндө бул кандай болоорун президент так айткан жок.
«Үстүбүздөгү жылдын жети айында эле биз мурдагы режимдин салык жана бажы мыйзам бузууларын жоюу жана улуттук кызыкчылыктарга ылайык тоо-кен тармагын өнүктүрүү аркылуу кошумча 12 млрд сом чогултууга жетиштик. Натыйжада, пенсияларды жана жөлөк пулдарды көбөйтүүгө, ошондой эле коронавируска каршы дарыларды жана вакциналарды сатып алууга даярданып жатабыз», – деди ал ал өз сөзүндө.
