Түрк компаниясы Бишкекте таштандыларды кайра иштетүү заводун курат
Кечээ, 6-августта Инвестициялар министринин жана Biotrend Energy компаниясынын өкүлдөрүнүн катышуусунда «Бишкекте таштандыларды кайра иштетүүчү заводду долбоорлоо жана куруу» инвестициялык долбоорун ишке ашыруу боюнча үч тараптуу меморандумдун алкагында жолугушуу болуп өттү. Бул тууралуу министрликтин маалымат кызматы кабарлады.
КРнын Инвестициялар министрлиги, Бишкек шаарынын мэриясы жана түркиялык Biotrend Energy компаниясы ушул жылдын 23-августунда Бишкек шаарында бул макулдашууга кол коюшкан болчу.
Меморандумду ишке ашыруунун алкагында, таштандыларды кайра иштетүүчү заводдун курулушун изилдөө үчүн жогоруда аталган компаниянын менеджерлери менен техникалык адистеринен турган чоң делегация Бишкек шаарына келди.
Жолугушууда Бишкекте таштандыларды кайра иштетүүчү заводдун курулушунун деталдуу планы, ошондой эле стадион куруу жана мейманкана бизнесин өнүктүрүү талкууланды.
- Biotrend Enerji – Doğanlar Holding компаниясынын туунду компаниясы. 2017-жылы альтернативдүү энергияны өндүрүүгө инвестициялоо миссиясын толуктоо үчүн технологияларды иштеп чыгуу жана колдонуу борбору болуп түзүлгөн. 2021-жылдын аягына карата Biotrend Enerji компаниясында 13 завод иш алпарат.
