Мадумаров: Садыр Жапаров шайлоого ашыкча кийлигишип жатат
«Бүтүн Кыргызстан» саясий партиясынын лидери Адахан Мадумаров Жогорку Кеңештин депутаттарын шайлап чыккандан кийин президент Садыр Жапаров менен УКМКнын башчысы Камчыбек Ташиевдин тандемин сынга алды.
Мадумаров административдик ресурс колдонулуп жатканын айтып, президент шайлоого «ашыкча кийлигишип жатканын» билдиргенин Kloop.kg жазды.
«Шайлоо дайыма атаандаштыкта өтөт. Бирок кандай атаандаштык болот, кандай деңгээлде, кандай маданияттуу шайлоо болот, бул башка маселе […] Административдик ресурсту [пайдалануу] болуп келген жана болуп жатат. Эгерде буга чейин мамлекет башчысы башка ыкмаларды колдонуп түз катышпаса, азыр ашыкча кийлигишип жатат», – деди ал.
Мадумаров ошондой эле УКМК «бир убакта өкмөттүн да, президенттин да басма сөз кызматына айланганын», ошол эле учурда БШКнын ыйгарым укуктарын айрым учурларда тартып алганын кошумчалады.
Бүгүн, 28-ноябрда Кыргызстанда Жогорку Кеңештин VII чакырылышынын депутаттарын кайра шайлоо өтүп жатат. Мындан бир жыл мурун, 2020-жылдын 4-октябрында өткөн шайлоо мурдагы президент Сооронбай Жээнбековдун кызматтан кетишине жана Садыр Жапаровдун бийликке келишине алып келген массалык нааразылык акцияларынан улам өтпөй калган.
Жогорку Кеңештин жаңы курамында 120 эмес, 90 депутат болот. Анын ичинен 54 депутат 5%дык босогодон өткөн партиялардан пропорционалдуу түрдө кирип, ар бир округдан 36дан депутат шайланат. Шайлоо жарышына 21 партия жана 282 бир мандаттуу талапкер катышууда.
