Комитетте Министрлер кабинети парламентке сунуштабай кабыл алган токтом талкууга түштү
Бүгүн, 14-февралда ЖКнын Агрардык саясат, суу ресурстары, экология жана регионалдык өнүктүрүү боюнча комитетинин жыйынында парламентке сунушталбай туруп, кабыл алынган №309-токтом боюнча талкуу болду.
Жыйында Министрлер кабинетинин 2021-жылдын 17-декабрындагы «Айыл чарба кооперативдерин, үрөнчүлүк жана асыл тукум чарбаларын өнүктүрүү жөнүндө» №309-токтому талкууга түштү.
Комитеттин мүчөсү Алишер Эрбаев токтом Жогорку Кеңештен өтпөгөндүгүн, бул баш мыйзамга каршы келип жатканын айтты.
«Баш мыйзамдын 86-беренесинин 3-пунктуна ылайык, мамлекеттик бюджеттин эсебинен каржылануучу, чыгымдары, көбөйтүү каралган мыйзам долбоорлору Миннистрлер кабинети каржылоо булагын аныктагандан кийин Жогорку Кеңеш тарабынан кабыл алынат деп мыйзамда жазылып турат. Бул токтом ЖКдан өткөн эмес», – деди ал.
Айыл чарба министрлигинин айтымында, ар бир мамлекеттик органдын өзүнүн компетенциясы бар жана Министрлер кабинети баш мыйзамга карабастан жерди тескөөгө байланышкан токтомдорду кабыл ала алат.
Ал эми Алишер Эрбаев ансыз деле жер кодексинде баары толук берилгенин, ал токтомду кабыл алып кереги жоктугун билдирди.
