Жыл сайын он миңдеген жарандар каржы пирамидалардын курмандыгы болушат – ИИМ

Ички иштер министрлиги жарандарга каржы  пирамидалардын ишинин мыйзамсыздыгы жөнүндө жана жарандарга «инвестициялардын» ордуна жеңил жана тез киреше сунуш кылган бүтүмдөргө катышпоону эскертет.

Алдамчылар кыймылсыз мүлк, облигациялар жана акцияларды сатып алууну сунушташат, жогорку кирешелүү интернет долбоорлоруна, курулушка жана айыл чарбасына акча салууга убада беришет. Жогорку натыйжалуу өндүрүшкө инвестиция салууга үгүттөп келишет.

«Өлкөбүздө жыл сайын бир нече он миңдеген жарандар каржы пирамидалардын курмандыгы болушат. Ар кандай каржы пирамидалар жарандардын чөнтөгүнөн алынган акча менен өнүгүп жатат.

Көпчүлүк жабырлануучулар акчаларынан кол жууганына моюн сунушуп, алдамчыларга карата эч кандай аракет көрүшпөйт. Анын натыйжасында   башка адамдарды алдоону улантууга өбөлгө түзүлүүдө. Эгер сиз алданып калган болсоңуз, анда мыйзам чегинде укугуңузду коргоого аракет кылыңыз!

Урматтуу жарандар, эгерде сиз же сиздин жакындарыңыз каржы пирамидасынын курмандыгы болсо же сизге карата укукка каршы аракеттер болуп жатат деп шектенип жатсаңыз — Ички иштер органдарына токтоосуз кайрылыңыз», – деп айтылат билдирүүдө.

ИИМ жарандарга мамлекеттин мыйзамдуу өкүлдөрү болгон мамлекеттик банктарга жана ипотекалык компаниялар менен гана өз ара кызматташууну сунуш кылат.

Белгилей кетсек, ИИМ «Ихсан» турак жай кооперативине кылмыш ишин козгоп, иликтөө иштери жүрүп жатат. Бул тууралуу Kloop.kg ведомствого шилтеме берүү менен билдирди.

Андыктан ИИМ жеңил акчанын артынан түшкөн жарандардын аз убакыттын ичинде чоң дивиденттерди убада кылган шылуундарга алданып, карызга батып, акча берип келгенин эске алып, бир канча билдирүүлөрдү жасады.

• Каржы пирамида – финансылык алдамчылыктын эң кеңири таралган түрлөрүнүн бири. Мында тартылган каражаттар боюнча, киреше жаңы катышуучуларды тартуу жолу менен төлөнүүчү схема болуп саналат.
• Алдамчылар, адатта, жакшы манипуляторлор жана акча алуунун жаңы жолдорун ойлоп табуу менен адамга психологиялык жана эмоционалдык жактан таасир этүүнү билишет.
• Алар кыймылсыз мүлктү, облигацияларды жана акцияларды сатып алууну сунушташат, алар супер рентабелдүү делген интернет-долбоорлорго, курулушка жана айыл чарбага инвестициялоого убада беришет.
• Каржы пирамидалар өздөрүн уюмдардын дээрлик бардык формасы катары жашыра алышат.
• Ак эмгек менен тапкан акчаңызды мындай уюмдарга салаардан мурда, кырдаалды кылдаттык менен баалаңыз. Суроо берүүдөн жана документтерди талап кылуудан коркуунун же тартынуунун кереги жок.
• Бул сиздин акчаңызды коргоо максатында болуп жатат жана эскерте кетүүчу нерсе, чоң суммадагы кирешелер чоң тобокелчиликтерсиз болбойт.