Казакстан буудай менен унду экспорттоого чектөө киргизди
Казакстан өлкөдөн буудай жана унду экспорттоого чектөө киргизди, тагыраак айтсак, бул азыктарга экспорттук квоталар киргизилди. Бул тууралуу Казакстандын Айыл чарба министринин биринчи вице-министри Айдарбек Сапаров билдиргенин Vlast.kz. маалымдады.
Анын айтымында, 15-апрелден 15-июнга чейин буудай жана унду экспорттоого квота киргизүү чечими кабыл алынган. Буудайга берилген квотанын көлөмү 1 млн тонна, унга 300 миң тоннаны түзөт.
Казакстандын бийлиги ички рынокто азык-түлүк тартыштыгынын алдын алуу үчүн квота киргизип жатканын айтып, өлкөдө жылына 3 млн тоннага жакын ун өндүрүлүп, бирок анын жарымы экспортко чыгарыларын эске салды.
Эске салсак, Кыргызстан буудайдын 57%ын Россиядан, 40%ын Казакстандан ташып келет.
Кошумча окуңуз: Кыргызстандагы дандын запасы 6 айга, Казакстандыкы 2 жылга жетет
