Майдын башынан Россияга жүргүнчүлөрдү ташыган темир жол каттамы жанданат – Самара, Новосибирск, Казань
Ушул жылдын апрель айынын аягынан же майдын башынан тартып, Россияга жүргүнчүлөрдү ташуу боюнча темир жол каттамы ачылат. Бул тууралуу бүгүн, 12-апрелде Транспорт, коммуникациялар, архитектура жана курулуш боюнча комитетинин жыйынында «Кыргыз Темир жолу» МИнин директору Азамат Сакиев билдирди.
Анын айтымында, эл аралык жүргүнчүлөрдү ташуу боюнча Казакстан, Россия темир жолдору менен сүйлөшүүлөр тынбай жүрүп жатат.
«Казакстан уруксат берди, бирок Россиядагы негизги штаб уруксат бербей жатат. 5-апрелде биздин кызматкерлер жүргүнчүлөрдү ташуу маселеси боюнча Москвага барып келишти. Бирок Москванын темир жол айланма жолун ремонт кылып жатышат экен, андыктан Бишкектен Самара, Казань, Новосибирскке чейинки жолду уруксат берип жатышат», – деди ал.
Ошондой эле «Кыргыз Темир жолу» МИнин директору Бишкек – Москва каттамы 2023-жылга чейин болбой турганын билдирди.
