Тоо-кен компаниясына мыйзамсыз документтер берилген – 2.3 млн сом зыян келген
Талас областтык прокуратурасы тарабынан токой-чарба өндүрүшүнүн жоготуулары үчүн төлөм албастан, укук күбөлөндүрүүчү документтерди тоо-кен компаниясына мыйзамсыз берүү фактысы аныкталган. Бул тууралуу КРнын Башкы прокуратурасынын маалымат кызматы билдирди.
«Тергөөдө, Бакай-Ата райондук жерге жайгаштыруу жана кыймылсыз мүлккө укуктарды каттоо боюнча башкармалыгынын мурдагы бөлүм башчысы Т.С.Т. өз жумушуна шалаакы мамиле жасап, жер аянтын жеринде изилдөөдөн өткөрбөй туруп, «Г.Ш.М.» ЖЧКсына укук күбөлөндүрүүчү документтерди берип жибергендиктен, мамлекетке 2 млн 353 миң 824 сом зыян келтирилгендиги такталган», – деп айтылат маалыматта.
Тергөөнүн жыйынтыгы менен жогоруда көрсөтүлгөн зыян «Г.Ш.М.» ЖЧКсы тарабынан толугу менен орду толтурулуп, аталган мамлекеттик мекеменин мурдагы бөлүм башчысы Т.С.Т. кылмыш жоопкерчилигине тартылган.
