КРда 1.5 млн жаш бала бар, маселе, келечекте аларды канткенде креативдүү экономиканын адамына айлантабыз – Абакиров
КРда 1.5 млн жаш бала бар, маселе, келечекте аларды канткенде креативдүү экономиканын адамына айлантабыз. Мындай оюн бүгүн, 20-апрелде Economist.kg басылмасы уюштурган «Креативдүү экономика – Кыргызстандын жаркын келечегине болгон үмүтүбү?» деп аталган тегерек столдо Элдар Абакиров айтты.
Экономика министринин экс-орун басары КРда калктын саны 6.5 млн адамга жетсе, анын дээрлик 1.5 миллиону жаш бала экенин, бул жаатта өлкөнүн потенциалы жогору экенин билдирди.
«Маселе, биз канткенде аларды креативдүү экономиканын адамдарына айлантабыз? Ал үчүн ар бир мектепке жакшы программист-мугалим керек. Алар окуучуларга бардыгын жеткиликтүү айтып бериши зарыл. Жакшы адистерди аймактарга жиберип, аларга жакшы шарт түзүп бериш керек», – деди ал.
Ошондой эле Абакиров Чыңгыз Айтматов, Сүймөнкул Чокморов, Болот Шамшиев сыяктуу улуу адамдар айылдан чыкканын, ал жакта кырдаал таптакыр башкача экенин, айылдардагы балдардын ойлонуу жөндөмдүүлүгү өзгөчө экенин айтты.
