IT адистери башка өлкөгө кетсе деле, жумушун, компаниясын жоготушпайт – Дина Руслан
Economist.kg басылмасы уюштурган «Креативдүү экономика – Кыргызстандын жаркын келечегине болгон үмүтүбү?» деп аталган тегерек столдо Codify Lab компаниясынын негиздөөчүсү Дина Руслан аймактардагы жаштардын абалы жана алардын IT тармагындагы маалыматтарга ач экендиги тууралуу сөз кылды.
«Аймактардагы жаштар менен сүйлөшкөндө, алар чет өлкөгө барып курулуш тармагында же такси айдап эмгектенгенден, же визажист болуудан башка альтернативаларды көрүшпөгөнүн байкайм. Мен бул кесиптерге эч кандай деле каршылыгым жок, бирок алар сервис тармагында гана карьера жасоону туура деп көрүшөт», – дейт ал.
Анын айтымында, IT индустриясын жаштарга жөн эле көрсөтүп коюу жетишсиз.
«Жөн эле көрсөтүп койсок, бул жөн гана бири-бирибиздин убактыбызды алып, жакшына сүйлөшкөн болуп калабыз. Бул жерде негизги маанилүү учур, кантип акча тапса болот. Биринчиден, бул нерсени эмне менен жейт түшүндүрүү керек», – деген Дина Руслан эмне үчүн IT адистиги оңой жана ыңгайлуу экенин айтты. – Анткени алар чемоданын жыйнап алып эле башка өлкөлөргө кетип кала алышат. Ошол эле кезде компаниясын дагы, жумушун дагы жоготушпайт, аларды ноутбугу менен кошо ала кетишет», – дейт ал.
Ошондой эле ал кенен маалымат берген тегерек столдорду Нарын, Кара-Кол сыяктуу башка аймактарда да өткөрүш керектигин, аймактардагы жаштар шаардагыларга караганда жаңы маалыматтарга ачык жана бат кабыл ала алаарын да кошумчалады.
