Кореялык авиакомпания Инчхон – Бишкек түз аба каттамын ачат
Кыргызстандын Корея Республикасындагы элчиси Аида Исмаилова Түштүк Кореянын T’Way авиакомпаниясынын президенти Енг Хонг Ген жетектеген делегация менен сүйлөшүүлөрдү өткөргөнүн ТИМдин басма сөз кызматы билдирди.
Жолугушууда тараптар Инчхон – Бишкек түз аба каттамын ачуу мүмкүнчүлүгүн талкуулашты.
Исмаилова түз аба каттамдын ачылышына эки өлкөнүн жарандары кызыкдар экенин жана бул маселе бардык деңгээлде көтөрүлүп жатканын белгиледи.
Өз кезегинде авиакомпаниянын президенти Енг Хонг Ген компания 2020-жылдын февраль айында эле Инчхон – Бишкек багыты боюнча түз авиакаттамдарды ишке ашырууга уруксат алганын, бирок пандемияда көптөгөн өлкөлөрдүн чек аралары жабылганына байланыштуу Кыргызстанга да туруктуу каттамдар кийинкиге жылдырылганын белгиледи.
Ишкана жетекчиси учурда 29 учактын ичинен 7 гана учак ар кайсы багытта кызмат өтөөрүн кошумчалады. Ал ошондой эле 2022-жылдын сентябрь айында узак аралыкка уча турган жаңы учактарды алуу пландалып жатканын, алар авиациялык коопсуздук боюнча сыноодон өтүшү керектигин айтты. Ошондой эле ал Кыргызстанга 2023-жылдан тартып туруктуу аба каттамдарын баштоону пландап жатышканын айтты.
T’Way компаниясынын президенти авиакомпания туруктуу каттамдарга чейин чартердик каттамдарды уюштурууга кызыкдар экенин жана жакынкы чартердик рейс 2022-жылдын 28-апрелине пландаштырылып жатканын билдирди.
