Автоунаалар, iPhone жана Бишкектен батир. Салык кызматынын лотереясына кантип катышса болот?
Мамлекеттик салык кызматы «Чек талап кылып, байге утуп ал!» кызыктыруучу лотереянын ишке киргизилгендигине байланыштуу Бишкекте ММК өкүлдөрүнүн катышуусу менен пресс-конференция уюштурду.
Жыйында Салык кызматынын төрагасынын орун басары Исламбек Кыдыргычов Кыргызстанда 10-майдан тартып кызыктыруучу лотерея расмий түрдө ишке киргизилгендигин белгилеп, жарандарды ага активдүү катышууга чакырды.
«Лотереяга катышуу – баалуу байгелердин ээси болууга мүмкүнчүлүк берет. Салык кызматынын тарыхында бул калктын жарандык активдүүлүгүн жогорулатууга жана салык төлөөчүлөрдүн ККМ колдонуу тартибин контролдоого багытталган алгачкы чоң долбоор. Чектер канчалык көп болсо, байге утуп алуу мүмкүнчүлүгү ошончолук жогору болот», – деп белгиледи ал.
- Автомобилдер, iPhone жана башка баалуу байгелер, ал эми башкы байге – Бишкектен батир ойнотулат.
Кыдыргычов лотереяга катышуу үчүн эмне кылуу керектигин түшүндүрдү.
- Утушка катышууну жана баалуу байгелердин ээси болууну каалагандар үчүн алгач Google play же AppStore аркылуу «Салык чек» мобилдик тиркемесин жүктөп алып, каттоодон өтүү керек.
- Андан кийин товарларды сатып алууда же кызматтарды пайдаланууда ККМдин гана кассалык чегин талап кылуу зарыл. Андан кийин мобилдик тиркемеге алынган кассалык чектин QR-кодун сканерден өткөрүү жетиштүү.
- Система сканерден өткөн кассалык чектин топтолгон суммасын утушка катышуу үчүн уникалдуу номерлерге автоматтык түрдө алмаштырат. 1000 сомго 1 уникалдуу ID номер ыйгарылат.
Лотереянын негизги максаты – жарандарды кассалык чекти талап кылууга үндөө жана ал аркылуу калктын салыктык сабаттуулугун жогорулатуу болуп саналарын Салык кызматынын төрагасынын орун басары белгиледи.
Лотерея Кыргызстандын бардык аймагында өткөрүлүп, 2022-жылдын 31-декабрына чейин уланат.
Утуш номерлерди тандоо лотереянын автоматташтырылган системасы аркылуу сандарды туш келди тандоо ыкмасы (рандом) аркылуу жүргүзүлөт.
Байгелердин биринчи туру 2022-жылдын 1-июлунда өткөрүлөт. Анда 2 автоунаа, 10 даана iPhone 13, 10 даана Samsung смартфону, 2 муздаткыч, 2 телевизор, 2 микротолкундуу меш, 2 кир жуугуч машина, 2 чаң соргуч, Ысык-Көлгө 5 жолдомо жана башка байгелер коюлат.
Экинчи тур 1-октябрга белгиленип, 1 автоунаа, 10 даана iPhone 13, 10 даана Samsung смартфону, 2 муздаткыч, 2 телевизор, 2 микротолкундуу меш, 2 кир жуугуч машина, 2 чаң соргуч жана башка байгелер ойнотулат.
Ал эми жыйынтыктоочу утуш 31-декабрда өткөрүлөт жана Бишкектен 1 бөлмөлүү батир, 1 автоунаа, 10 даана iPhone 13, 10 даана Samsung смартфону, 2 муздаткыч, 2 телевизор, 2 микротолкундуу меш, 2 кир жуугуч машина, 2 чаң соргуч жана башка байгелер өз бактылуу ээлерин күтөт.
Лотереяга 18 жаштан жогорку адамдар катыша алышарын белгилей кетүү зарыл.
