Май айындагы селдин кесепетинин зыяны 90 млн сом деп бааланды
Үстүбүздөгү жылдын май айында болуп өткөн табигый кырсыктардан, акыркы мезгилдеги селден келген чыгым 90 млн сомду түзөт. Бул тууралуу кечээ, 11-майдагы Жогорку Кеңештин жыйынында Өзгөчө кырдаалдар министринин орун басары Урматбек Шамырканов билдирди.
Жыйында баяндама жасаган Шамырканов Сузак районунун Атабеков, Барпы, Сузак айыл аймактарындагы жүргөн селден улам жалпы 907 турак үй жабыркап, 23 үй авариялык абалга келгенин жана 12 социалдык объектини сел каптаганын, мындан тышкары, 3 ички чарбалык көпүрө, 210 гектар айдоо аянты, 16 миң метрден ашуу ички чарбалык жол жана 6300 метр арык бузулганын билдирди.
Алдын-ала эсептөөлөргө таянсак, Сузак районунда жүргөн селдин кесепети 68 млн 470 миң 500 сомду түзсө, чыгымдын көлөмү Алай районунда 5 млн 747 миң сом, Ноокат районунда 10 млн 348 миң сом, Лейлек районунда 241 миң 988 сом, Кадамжай районунда 3 млн 201 миң сом, Кара-Буура районунда 611 миң сом, Бакай-Ата районунда 241 миң 576 сомдук зыян алып келди», – деди ал.
