Ак үйдүн алдында казинолордун ачылышына каршы митинг өтүп жатат
Бүгүн, 16-майда Ак үйдүн имаратынын алдында казинолорду ачууга каршы митинг өтүп жатканын «Марал» радиосу кабарлады.
60ка чукул киши кумарканалардын элге тийгизе турган кесепеттери тууралуу эскертишүүдө деп жазат аталган радионун маалымат порталы. Алар бийлик өкүлдөрүнө, Жогорку Кеңештин депутаттарына кайрылып, өлкөдө кумаркана ачууга багытталган мыйзам долбоорун артка чакыртып алууну талап кылып жатышат.
Жарандык активисттердин бири Акжолтой Тукуновдун айтымында, мындай нааразылык акциялары башка аймактарда да өтүп жатат.
Эскерте кетсек, Жогорку Кеңештин депутаттары Кыргызстанда чет элдиктер үчүн казино ачууну караган «КРдагы оюн-зоок ишмердүүлүгү жөнүндө» мыйзам долбоорун биринчи окууда жактырган. Белгилей кетсек, казино ачууну министрлер кабинети демилгелеген болчу. Бийлик казино ачууну жактаган негизги жүйөө катары бюджеттин кирешесинин көбөйүшүн айтып келет.
