Актануу сөздөрү уланууда – мамлекеттик төрт компания эмне үчүн Санарип министрлигине өтүп кеткенинин себебин айтышты
Санариптик өнүктүрүү министри Талантбек Иманов мамлекеттик төрт компания – «Дастан», MegaCom, «Кыргызтелеком» жана «Евразия сактык банкы» Санариптик министрлигине эмнеге өткөнүнүн себебин айтты. Бул тууралуу министрликтин маалымат кызматы билдирди.
«Жогоруда аталган ишканаларды МКБнын башкаруусуна өткөрүп берүүнүн негизги максаты – материалдык-техникалык базаны мүмкүн болушунча чыңдоо, жогорку финансылык туруктуулугу жана инвестицияны өнүктүрүү үчүн инвестиция тартуу мүмкүнчүлүгү бар жогорку технологиялык санариптик холдингди түзүү.
Мисалы, ошол эле «Дастан» ТНКсынын базасында чоң дата борборун түзүү пландалууда. Бул бизге бардык маалыматтык системаларды консолидациялоого жана кырсыктарга сабырдуулукту камсыздоого жана эң маанилүү нерсени – биздин өлкөнүн маалыматтык коопсуздук көйгөйлөрүн чечүүгө мүмкүндүк берет.
«Альфа Телеком» ЖАК жана «Кыргызтелеком» ААК – мамлекеттик керектөөчүлөрдүн көз карашында тариф саясатын оптималдаштыруу; бирдиктүү улуттук биллинг системасын түзүү жана санариптик экономикада зымсыз технологияларды өнүктүрүү.
«Евразия сактык банкы» ААК – банктын бардык бизнес процесстерин санариптештирүү, аралыктан банктык тейлөө кызматтары (санариптик банк) бизнес процессинде толук электрондук жүгүртүү, менеджерлер үчүн бирдиктүү электрондук банкты башкаруу борбору жана кызматкерлер үчүн бизнес-процесстер боюнча электрондук билим базасы, ачык экосистема катары системалуу финансылык банк архитектурасын түзүү.
Натыйжада, акыркы этапта Холдинг КРнын ИДПсынын 15%га чейинкисин кайра иштете алат. Улуттук кырдаал борбору республиканын экономикасынын болжолдуу моделдерин чыгара алат», – дейт Иманов.
Эскерте кетсек, мурда Мамлекеттик мүлк фондуна караган «ТНК Дастан» ААК, «Альфа Телеком» ЖАК (MegaCom уюлдук оператору), «Кыргызтелеком» ААК жана «Евразия сактык банкы» ААК Санариптик өнүктүрүү министрлигине өттү. Буга министрлер кабинетинин төрагасы Акылбек Жапаров кол койгон.
Бирок бул өзгөрүү «Дастан» ишканасынын мурдагы жетекчиси Алексей Ширшов Кыргызстанга кайтып келгенден кийин кабыл алынды. Эскерте кетсек, ал келгенде УКМК аны жарым суткага камакка алып, бирок кийин соттун чечими менен үй камагына чыгарып жиберген болчу.
Санариптик өнүктүрүү министри Талантбек Иманов 2010-жылдын 7-апрелине чейин Ширшовдун жеке айдоочусу болуп иштеген.
11-майда Kaktus.media өз булактарына таянып, Ширшов Санариптик өнүктүрүү министри Талантбек Иманов жана Нурлан Байымбетов аттуу бир адам менен чогуу саат 17:00дөр чамасында «Дастан» ишканасынын жетекчиси Эрик Апышевдин кабинетинде чогулганын жана ал жердей эки сааттай баарлашканын жазган эле. Kaktus.media порталынын журналисти Ширшовдун Эрик Апышевдин кызматтык унаасы менен «Дастан» ишканасынын аймагынан чыгып баратканына да күбө болгон.
Президент Садыр Жапаров Ширшовдун Кыргызстанга кайра кайтып келишин Максим Бакиевдин эсебиндеги 200 млн долларды кайтарып берүүгө жардам берери менен түшүндүргөн жана аны өзү кабыл алганын да айткан. Кыргызстан Бириккен демократиялык кыймылы мамлекет башчы мындай аракеттери менен коомчулукту адаштырышы мүмкүн экенин билдирди.
ЖМКдагы маалыматтардан соң, бийлик башындагылар мамлекеттик төрт компаниянын аталган министрликке эмнеге өткөндүгүн «актануу маанайында» байма-бай маалыматтарды бере башташты.
