Доллар төмөндөдү, бирок комбанктардын пайыздары эсептик ченден улам көтөрүлгөн бойдон калды – депутат

Бүгүн, 16-майда Бюджет, экономикалык жана фискалдык саясат боюнча комитетинин жыйынында «Банк жана банк иштери жөнүндө» мыйзам долбоору каралды.

Жыйында депутат Эмил Токтошев Улуттук банктын төрагасы Кубанычбек Бөкөнтаевге эсептик чен боюнча суроолорун берди.

«Мына, Россиянын борбордук банкы эсептик ченди түшүрдү. Бизде болсо 14%. Доллар өстү, кайра ордуна түшүп, андан да ылдыйлап кетти. Коммерциялык банктардын пайыздары түшкөн жок. Сиздер элдерди ойлойсуздарбы же банктардын эле пайдасын ойлойсуздарбы?» – деп сурады депутат.

«Сиз айрым эле компонеттерди айтып жатасыз. Биз эмне себептен эсептик ченди көтөрдүк, анткени инфляция жогорулайт деген ой менен көтөрдүк. Ошондуктан пайыздык ченди ушул эле деңгээлде кармап турабыз. Эгерде инфляция өспөй турган белгилерди көрсөк, анда эсептик ченге өзгөртүүлөрдү киргизүүнү карап чыгабыз», – деди Улуттук банктын төрагасы.

Эмил Токтошев бул азыр банктын гана көз карашы экенин айтып, Экономика министрлигине учурдагы экономикалык божомолдорду карап чыгууну сунуштады.

Ошондой эле комитеттин жыйынында министрлер кабинетинин төрагасы тарабынан демилгеленген «КРнын Улуттук банкынын пайдасын которуу маселелери жөнүндөгү», «КРнын айрым мыйзам актыларына ( «Атаандаштык жөнүндө», «КРнын табигый монополиялар жөнүндө») өзгөртүүлөрдү киргизүү жөнүндөгү» мыйзам долбоорлору үчүнчү окууда жактырылды.

Эске салсак,  25-апрелде Улуттук банк эсептик чен өлчөмүн 14% деңгээлинде сактап калуу чечимин кабыл алган. Мындай чечим көзөмөл орган жүргүзүлүп жаткан акча-кредит саясаты КРда инфляциялык тобокелдиктерди ооздуктоого жана инфляциялык күтүүлөрдү төмөндөтүүгө багытталат деп түшүндүргөн.