Улуттук банктын кирешесин ким текшере алат? – регулятор жооп берет
Бүгүн, 16-майда Бюджет, экономикалык жана фискалдык саясат боюнча комитетинин жыйынында «Банк жана банк иштери жөнүндө» мыйзам долбоору каралууда.
Жыйында депутат Эмил Токтошев Улуттук банктын кирешесин кимдер текшере ала тургандыгын сурады. Жыйында баяндама жасаган Улуттук банктын төрагасы Кубанычбек Бөкөнтаев жөнгө салуучу органдын кирешесин тышкы аудит жана Эсеп палатасы текшерүүгө укуктуу экендигин маалымдады.
«Улуттук банктын үстүнөн жүргүзүлчү тышкы аудитти Жогорку Кеңештин депутаттары тандайт. Бирок эл аралык тышкы аудит жүргүзүүчү уюмдар аз эле. Экинчи жагынан Эсеп палатасы текшерет», – деди Бөкөнтаев.
Депутат учурда президенттик башкаруу экенин, ошондой эле ал жөнгө салуучунун ишин кантип текшерээрине кызыкты жана Жогорку Кеңеш да текшерүүгө укугу барбы деген суроосун койду.
«Эсеп палатасы боюнча кабыл алына турган мыйзамга норма киргизилген, ал мыйзам кабыл алынса, президент талап кылган бүт багыт текшерилип чыгат. Ал эми Жогорку Кеңеш тышкы аудитор аркылуу текшере алат», – деди ал.
