Сауд Арабиясынын айыл чарба министри менен Кыргызстандан айыл чарба продукциясын экспорттоо маселеси талкууланды
20-июнда Тышкы иштер министри Жээнбек Кулубаев Эр-Риядда Сауд Арабиясынын айыл чарба министри Абдулрахман бин Абдулмохсен Аль-Фадли менен Кыргызстандан айыл чарба продукциясын экспорттоо маселесин талкуулады. Бул тууралуу Тышкы иштер министрлигинин басма сөз кызматы билдирди.
Тараптар эл аралык күн тартибинин маанилүү аспектилери, анын ичинде азык-түлүк коопсуздугу жана гуманитардык кризис боюнча пикир алышышты.
Кулубаев өз кезегинде кыргыз тарап Сауд Арабиясына ата мекендик продукцияны экспорттоону көбөйтүүгө кызыкдар экенин белгилеп, эки өлкөнүн ортосунда үзгүлтүксүз түз аба каттамдарын эртерээк ачуу зарылдыгына токтолду.
Жолугушуунун жыйынтыгында тараптар эки өлкөгө тең пайдалуу биргелешкен долбоорлорго күч-аракетин жумшап, дайыма байланышта болууну макулдашышты.
