Жүгүртүүсү 8 млн сомго чейин үй-бүлөлүк бизнес салык төлөөдөн бошотулат
Министрлер кабинети жылдык жүгүртүүсү 8 млн сомго чейин болгон үй-бүлөлүк бизнестерди салык төлөөдөн бошотууга убада берди. КР Өкмөтүнүн аппарат жетекчиси Акылбек Жапаровдун төрагалыгы алдында өткөн контролдук-кассалык машиналарды (ККМ) ишке киргизүү боюнча сунуштарды талкуулаган жумушчу топтун отурумунда ушундай чечим кабыл алынды. Бул тууралуу минкаб басма сөз кызматы билдирди.
Чогулуштун жыйынтыгында бир катар чечимдер кабыл алынып, анын арасында үй-бүлө мүчөлөрү менен бирге ишкердик менен алектенген чакан жана орто бизнестин өкүлдөрүнүн жылдык жүгүртүүсү 8 млн сомго жетпесе, аларды салыктан бошотуу жөнүндө министрлер кабинети белгиледи.
Акыркы жыйында Экономика министрлигинин, Салык кызматынын кызматкерлеринин жана контролдук-кассалык машиналарды милдеттүү түрдө киргизүүгө каршы болгон ишкерлердин 10 күндүк ишинин жүрүшүндө иштелип чыккан жумушчу топтун сунуштары талкууланды.
Министрлер кабинетинде айтылгандай, ишкерлердин маалымдуулугун жогорулатуу боюнча ишти улантуу чечими кабыл алынды, анткени алардын көпчүлүгү кассалык машиналар менен иштөөнү түшүнбөй жатканын моюнга алышты. Ошону менен бирге министрлер кабинетинин башчысы алкоголдук ичимдиктерди, курамында алтыны бар продукцияларды, мунай продуктыларын сатуу менен алектенген ишкерлер контролдук-кассалык аппараттарды сөзсүз түрдө колдонуп, сатылып жаткан продукцияга эсеп-фактуралары болушу керектигин баса белгиледи.
Жолугушууда Жапаров ишкерлерге ККМ киргизүү үчүн эң ийкемдүү шарттар түзүлөрүн айтты. Ошол эле учурда салыктарды төлөө Кыргызстандын ар бир жаранынын конституциялык милдети болуп саналат.
Жумушчу топтун кезектеги жыйыны бир жумадан кийин өтүп, анда бизнестин башка категориялары талкууланып, ал үчүн кассалык машиналарды ишке киргизүү үчүн өзгөчө шарттарды түзүү пландалууда.
