МИК: Ипотекалык каражат сурап жатканда кандай учурда өнөктөш банк каржылоодон баш тартышы мүмкүн?
Мамлекеттик ипотекалык компания (МИК) өнөктөш банк кайсы учурда кардарга каржылоодон баш тартып коюшу мүмкүн экендигин айтып берди.
- МИКтин өтүнмөсү (заявкасы) жактырылган жарандар өнөктөш банктарга (“РСК”, “Айыл Банк”, “Бакай Банк”) барып кезекке турат
- Кезеги келген жаранга «сизге тиешелүү документтерди чогултууга жана үй издөөгө 20 күн убакыт берилет» – деген смс барат
- Банктын кызматкерине барып кандай документтерди чогултуу керектигин тактап аласыз
- Сиз 20 күндө тиешелүү документтерди чогултуп, ошондой эле өзүңүзгө жаккан жана турак жай Программасынын талаптарына туура келген үйдүн документтерин да тапшырасыз.
“Андан соң банк сиздин заявкаңызды карап баштайт. Ошол учурда сиздин башка кредиттериңиз болсо, аларды толук төлөшүңүз керек болот. Анткени өнөктөш банк чечим кабыл алууда сиздин кредиттик тарыхыңызга карайт. Банктардын «кара тизмесине» кирип калган болсоңуз кредиттик комитет сиздин заявкаңызды каржылоодон баш тартышы мүмкүн!” – дейт МИК.
Андан сырткары, банктын кызматкери сиздин үй-бүлөлүк кирешеңиздерди да эсепке алат. Ошондуктан сиз документтерди тапшырып жатканда өзүңүздүн, жубайыңыздын жана башка үй-бүлө мүчөлөрүнүн айлык акыларын тастыктаган справканы да кошуңуз. Ошондой эле кошумча киреше булактары болсо аны да көрсөтүңүздөр, балким, чакан бизнесиңиз бар, же негизги жумуштан сырткары дагы кошумча жумушта иштейсиз, ошонун баарын көрсөткөнгө аракет кылыңыз. Анткени бул жагдай кредиттик комитет чечим чыгарууда эске алынат.
Сиз МИКке ипотека алууга арыз бергенден баштап каржылоого кезегиңиз жеткенче ай сайын үй-бүлөңүздүн кирешесинен акча үнөмдөп ипотекаңыздын баштапкы төлөмүн акча каражат чогулта баштаңыз. МИКтин кароосунун өтүп банкта кезегиңиз жеткенче жакшы эле сумма чогулуп калат. Баштапкы төлөмгө сиз канчалык көп сумма чогутсаңыз, кредиттик комитет сиздин завкаңызды кароодо ошол жагдайды да эске алат. Ошондой эле келечекте ипотекаңызды төлөө да ошончолук жеңилдик болот.
Ипотекаңызга баштапкы төлөмдү кантип чогутсаңыз болот?
Мамлекеттик ипотекалык компаниянын алдында түзүлгөн «Ак-Босого» турак жай сактык компаниясында депозиттик эсеп ачып, ай сайын кирешеңизден үнөмдөгөн акчаны салып турасыз. 3000 же 5000сом минималдуу сумма жана каржылык мүмкүнчүлүгүңүзгө жараша чогулта бересиз.
«Ак-Босого» турак-жай сактык компаниясында депозит эсеп ачып акча каражат чогултуу сизге дагы кандай мүмкүнчүлүктөрдү берет? Сиз «Ак-Босогодо» депозит эсеп ачкандан кийин эгерде үй ала турган сумманын 30%ын чогултуп койсоңуз, банктагы кезегиңиз жете элек болсо да Ак-Босого аркылуу мамипотека алсаңыз болот. Айлап, жылдап кезек күткөнчө бул албетте жакшы мүмкүнчүлүк, ошондуктан мындай мүмкүнчүлүктү да колдонсоңуз болоорун эскертебиз”, – дешет МИКтин адистери.
