Коомдук жайларга жарым жылда 2.1 миң видеокамера орнотулду
Санариптештирүү ишмердигин өнүктүрүү үчүн өлкөнүн коомдук жайларына 2 миң 141 видеокамералар орнотулду. Бул тууралуу ИИМ 2022-жылдын 6 ай ичиндеги ыкчам-кызматтык ишмердүүлүгүн жыйынтыктап жатып билдирди.
“Анын ичинен, 200 видеокамера аркылуу ИИМдин Ыкчам башкаруу борбору өлкөдөгү криминогендик абалды онлайн көзөмөлдөөдө. Жыл аягына чейин жалпы 241 видеокамераларын кошуу мерчемделген”, – деп айтылат маалыматта.
Ички иштер министринин орун басары Адыл Бийбосунов баяндама жасап жатып, милициянын элге жакын болушун камсыздоо, калк арасындагы көйгөйлөрдү жеринде кабыл алуу жана чечүү, тиешелүү жардам көрсөтүү максатында түзүлгөн 57 милициянын көчмө кабылдамалары иш алып барып жатканын айтты.
Милиция кызматкерлеринин коопсуздугун камсыз кылуу, керек болгон учурда операторлор аркылуу тез арада жардам жөнөтүү, мыйзам бузууларды видефиксациялоо жана кызматкерлер арасында коррупциялык көрнүнүштөргө бөгөт коюу максатында, 24 даана боди-камералар сервердик жабдыгы менен алынып, Бишкек шаарынын милициянын участкалык уполномоченныйларына таратылган.
