КРга ташылып жаткан көмүрдүн көлөмү көбөйгөнүнө байланыштуу Казакстан көмүрүн автоунаа менен экспорттоого тыюу салат
Казакстан көмүрдү автотранспорт менен экспорттоого тыюу салууну пландап жатат. Тиешелүү буйрук Казакстандын Өнөр жай жана инфраструктуралык өнүктүрүү министрлигинин Өнөр жайды өнүктүрүү комитети тарабынан даярдалганын казакстандык ЖМКлар билдиришти.
Казакстан 1-августтан баштап алты айлык мөөнөткө көмүрдү экспорттоого тыюу салууну көздөөдө. Анын себебин муниципалдык кызматтарды жана калкты көмүр менен камсыздоо зарылчылыгы деп түшүндүрүшүүдө.
Комитеттин негиздемесинде ички рынокко багытталган көмүр экспорттолот деп жазылган.
“Талдоо көрсөткөндөй, коңшу мамлекеттерге, тагыраак айтканда, Кыргызстанга – 19%га, Өзбекстанга – 30%га көмүр экспорту өсүп кеткен. 2021-жылы КРга казак көмүрүнүн экспорту 1 млн 143 миң тоннаны түзсө, анын 1 млн 20 миң тоннасы темир жол транспорту аркылуу экспорттолгон”, – деп айтылат маалыматта.
Белгилей кетсек, Кыргызстандын бийлиги да буга чейин көмүрдү ташып чыгууга тыюу салып, темир жол аркылуу гана ташууну сунуштаган. КРда бул чечим контрабанданы кыскартуу, ошондой эле экспорттук операциялардын ишенимдүү эсебин жүргүзүү зарылчылыгы менен түшүндүрүлгөн.
Ошондой эле Энергетика министри Доскул Бекмурзаев Бишкек ЖЭБине жергиликтүү гана көмүр ташылып, “Каракечеге” артыкчылык берерин да айткан эле.
