Кумар оюндарын уюштуруу боюнча үч жобо бекитилип, жөнгө салуучу органдар дайындалды
1-августта минкаб башчысы Акылбек Жапаров министрлер кабинетинин N440 токтомуна кол коюп, ага ылайык кумар оюндарын уюштурууга байланыштуу үч жобо бекитилди. Бул тууралуу маалымат минкабдын 1-августтагы токтомунда жазылган.
Министрлер кабинети төмөнкү жоболорду бекитти:
- Кумар оюндарын уюштурууну мамлекет тарабынан жөнгө салуу жөнүндө
- Кумар оюндарын уюштурууну лицензиялоо жөнүндө
- Кумар оюндарын уюштурган субъектилердин отчёт тапшыруусунун жана ачык маалымат көрсөтүшүнүн тартиби жөнүндө
Жапаров кол койгон токтомго ылайык, онлайн жана виртуалдык казинолорду кошпогондо, кумар оюндарын уюштурууну жөнгө салуу боюнча ыйгарым укуктуу мамлекеттик орган болуп Экономика министрлигине караштуу Финансы рыногун жөнгө салуу жана көзөмөлдөө кызматы (Госфиннадзор) дайындалды.
Санариптик өнүктүрүү министрлигине караштуу Байланыш тармагын жөнгө салуу жана көзөмөлдөө кызматы онлайн жана виртуалдык казинолордо кумар оюндарын уюштурууну жөнгө салуу боюнча ыйгарым укуктуу мамлекеттик орган болуп аныкталды.
